Псалтыр 43 - Коми Библия 2023

43 Псалом

¹ Сьылысьясӧн веськӧдлысьлы. Корей пиянлӧн сьыланкыв.

² Енмӧй, ми асланым пельясӧн кывлім, батьясным миянлы висьталісны, мый Тэ вӧчлін важӧн, вӧчлін налӧн олан кадӧ.

³ Аслад киӧн Тэ бырӧдін мукӧд войтыръясӧс, вермин найӧс да вӧтлін тайӧ муысь, овмӧдін татчӧ миянлысь батьясӧс.

⁴ Эз шыпурт отсӧгӧн босьтны миян батьяс тайӧ мусӧ, эз асланыс вынӧн найӧ вермыны, а Тэнад веськыд киӧн да вынӧн, Тэнад чужӧмбаныдлӧн югыдӧн, ӧд Тэ вӧлін бур сьӧлӧма на дінӧ.

⁵ Енмӧй, Тэ менам Ӧксыӧй, сет мездмӧмсӧ Яковлы!

⁶ Тэкӧд ми люкалам дзескӧдысьясӧс, Тэнад нимӧн ми талялам паныд кыпӧдчысьясӧс.

⁷ Аслам ньӧввуж вылӧ ме лачаӧс ог кут, менам шыпуртӧй оз мезды менӧ,

⁸ но Тэ мездан миянӧс дзескӧдысьясысь, янӧдан мустӧмтысьясӧс.

⁹ Быд лун ми кутам ошйысьны Енмӧн, Сылысь нимсӧ кутам ошкыны нэмъяс чӧж.

¹⁰ Но Тэ эновтін да янӧдін миянӧс, миянкӧд ӧтвыв эн пет тышӧ.

¹¹ Тэ сетін дзескӧдысьяслы вӧтчыны миян бӧрся, мустӧмтысьяслы куштыны миянӧс.

¹² Ыжъясӧс моз Тэ сетін налы миянӧс сёйны, разӧдін миянӧс войтыръяс пӧвстӧ.

¹³ Донтӧм донысь Тэ вузалін Ассьыд войтыртӧ, сылысь донсӧ эн кыпӧд.

¹⁴ Тэ сетін орччӧн олысьяслы миянӧс омӧльтны, матігӧгӧрса олысьяс сералӧны-лёкӧдӧны миянӧс.

¹⁵ Ми лоим шусьӧгӧн войтыръяслы, юрнас довкйӧдлӧмӧн найӧ сералӧны миян вылын.

¹⁶ Быд лун менӧ янӧдӧны, менам чужӧмӧй сотчӧ

¹⁷ менӧ лёкӧдысьяслӧн да суклясьысьяслӧн сёрниысь, мустӧмтысьяслӧн да водзӧс перйысьяслӧн видзӧдӧмысь.

¹⁸ Ставыс тайӧ суис миянӧс, но ми эгӧ вунӧдӧй Тэнӧ, эгӧ торкӧй йитӧдтӧ, мый Тэ кӧрталін миянкӧд.

¹⁹ Сьӧлӧмным эз бергӧдчы Тэысь, кокным эз кеж Тэнад туй вылысь.

²⁰ Но Тэ пасьвартін миянӧс гундыръяслӧн му вылын, вевттин миянӧс сап пемыдӧн.

²¹ Енмӧй, ми кӧ вунӧдім Тэнсьыд нимтӧ, нюжӧдім кинымӧс ылӧг ен дінӧ,

²² Тэ эськӧ тӧдін та йылысь, Тэ ӧд тӧдан сьӧлӧмпытшса став гусяторсӧ.

²³ Но Тэ вӧсна быд лун миянӧс виалӧны, лыддьӧны начкыны дасьтӧм ыжъясӧн.

²⁴ Чеччы, Господьӧй, эн узь, садьмы, эн вӧтлы миянӧс пыр кежлӧ!

²⁵ Мыйла Тэ тупкан Ассьыд чужӧмбантӧ, мыйла вунӧдін сьӧкыдалӧмнымӧс, вунӧдін миянӧс дзескӧдӧмсӧ?

²⁶ Ӧд миянӧс талялӧны няйтӧс моз, ми усим чужӧм выланым, туплясям муас.

²⁷ Господьӧй, чеччы да отсав миянлы, Аслад буралӧмыд кузя мезды миянӧс!