Псалтыр 41 - Коми Библия 2023

41 Псалом

¹ Сьылысьясӧн веськӧдлысьлы. Корей пиянлӧн сьыланкыв.

² Кыдзи горш косьмигас кӧр тэрмасьӧ визув ва дорӧ, сідзи менам лолӧй ёна кӧсйӧ Тэ дінӧ, Енмӧй.

³ Менам лолӧй ёна гажтӧмтчӧ [вына да] ловъя Енмысь. Кор нин ме верма сувтны Енлӧн чужӧмбан водзӧ?

⁴ Лун и вой ме пӧткӧдча аслам синваӧн, ӧд быд лун менсьым юасьӧны, кӧні пӧ тэнад Енмыд.

⁵ Ме восьта ассьым сьӧлӧм дойӧс, казьтывла гажӧдчан кадсӧ, кор ми ыджыд чукӧрӧн ветлім Енлӧн крамӧ да гораа нимкодясьӧмӧн аттьӧалім Енсӧ.

⁶ Мыйла шогсян да майшасян, менам лолӧй? Лача кут Ен вылӧ! Ме кута на ошкыны Сійӧс, ассьым Енмӧс да Мездысьӧс.

⁷ Менам лолӧй дзикӧдз нюкыртчӧма, та вӧсна ме казьтывла Тэнӧ Йӧрдан юбокса му вылын, Ермон да Мицар керӧсъясын.

⁸ Пыдӧстӧм саридзьяс гораа сёрнитӧны ӧта-мӧдныскӧд, Тэнад ваясыд ыджыд шыӧн бузгӧны, став Тэнад гыясыд мунӧны менам юр весьтті.

⁹ Луннас Господь петкӧдлӧ Ассьыс буралӧмсӧ, а войнас ме сьылӧмӧн ошка Сійӧс, кевмыся менам олӧмӧйлӧн Енлы.

¹⁰ Ме шуа менӧ дорйысь Енлы: «Мыйла Тэ вунӧдін менӧ? Мыйла меным лоӧ шогсьыны мустӧмтысьяслӧн дзескӧдӧмысь?»

¹¹ Дойыс йиджӧ менам лыясӧдз, кор мустӧмтысьяс янӧдӧны менӧ, быд лун юасьӧны менсьым, кӧні пӧ тэнад Енмыд.

¹² Мыйла шогсян да майшасян, менам лолӧй? Лача кут Ен вылӧ! Ме кута на ошкыны Сійӧс, ассьым Енмӧс да Мездысьӧс.