Псалтыр 40 - Коми Библия 2023

40 Псалом

¹ Сьылысьясӧн веськӧдлысьлы. Давидлӧн псалом.

² Шуда сійӧ, коді тӧждысьӧ гӧль [да коньӧр] морт вӧсна. Господь отсалӧ сылы сьӧкыд кадӧ,

³ дорйӧ сійӧс да видзӧ сылысь олӧмсӧ. Аслас муас сійӧс шуӧны майбырӧн, Господь оз сет сійӧс мустӧмтысьяслӧн киӧ.

⁴ Сылӧн висигас Господь ёнмӧдӧ сійӧс, чеччӧдӧ сійӧс вольпасьысь.

⁵ Ме шуи: «Господьӧй, ме мыж вӧчи Тэныд паныд. Ло бур сьӧлӧма ме дінӧ, бурдӧд менӧ!»

⁶ Менӧ мустӧмтысьяс лёка сёрнитӧны ме йылысь: «Мед эськӧ сійӧ кулас, мед эськӧ вунӧдасны сылысь нимсӧ!»

⁷ Менӧ видлыны волысь сёрнитӧ пӧръясьӧмӧн, сьӧлӧмас сылӧн чужӧны лёк мӧвпъяс, петӧм бӧрас сійӧ суклясьӧ ме йылысь.

⁸ Менӧ мустӧмтысьяс вашкӧдчӧны ас костаныс, мӧвпалӧны меным лёксӧ вӧчны.

⁹ Найӧ шуалӧны: «Кулӧмыслӧн выныс уськӧдіс сійӧс кок йывсьыс, сійӧ оз нин вермы чеччынысӧ».

¹⁰ Весиг матысса ёртӧй, кодлы ме эски, кодкӧд ӧтвыв сёйлім, сувтіс меным паныд.

¹¹ Но Тэ, Господьӧй, ло бур сьӧлӧма ме дінӧ, сувтӧд менӧ кок йылӧ, сэки ме водзӧс перъя налысь.

¹² Мустӧмтысьяс кӧ оз вермыны менӧ, сэки ме тӧдмала, мый Тэ бур сьӧлӧма ме дінӧ.

¹³ Тэ видзан менӧ, ӧд ме сӧстӧма ола. Тэ сувтӧдан менӧ Аслад чужӧмбан водзӧ пыр кежлӧ.

¹⁴ Ошкӧм Господьлы, Израильлӧн Енлы, нэмъяссянь нэмъясӧдз! Аминь, аминь!