Псалтыр 4 - Коми Библия 2023

4 Псалом

¹ Сьылысьясӧн веськӧдлысьлы. Ворсӧны струнаа ворсанторйӧн. Давидлӧн псалом.

² Кор ме шыася Тэ дінӧ, вочавидз меным, веськыда вӧчысь Енмӧй! Кор меным вӧлі дзескыд, Тэ восьтін меным петан туйсӧ. Кыв менсьым кевмӧмӧс, ло бур сьӧлӧма ме дінӧ.

³ Морт пиян, дыр-ӧ ті понданныд лёкӧдны менсьым нималӧмӧс, дыр-ӧ ті понданныд радейтны ковтӧмсӧ да корсьны ылӧгсӧ?

⁴ Тӧдӧй, мый Господь торйӧдіс Аслыс эскана кесйӧгӧс, Господь кылӧ, кор ме шыася Сы дінӧ.

⁵ Скӧраліганыд энӧ мыжмӧй. Вольпасяд куйлігӧн чӧв олӧй да мӧвпалӧй ас пытшканыд.

⁶ Вайӧй шогмана висьяс да лача кутӧй Господь вылӧ.

⁷ Унаӧн шуалӧны: «Коді сетас миянлы бурсӧ?» Господьӧй, петкӧдлы миянлы Аслад чужӧмбанлысь югыдсӧ.

⁸ Тэ сетан менам сьӧлӧмӧ нимкодьлунсӧ ёна унджык на дорысь, кодъяслӧн тырмымӧн [вый,] нянь да вина.

⁹ Ме лӧня вода да узя, ӧд сӧмын Тэ, Господьӧй, сетан меным повтӧг овнысӧ.