Псалтыр 38 - Коми Библия 2023

38 Псалом

¹ Едутунлы, сьылысьяслӧн веськӧдлысьлы. Давидлӧн псалом.

² Ме шуи: «Кута видзӧдны ас бӧрся, медым аслам сёрниӧн эг мыжмы. Ог восьт вомӧс, чӧв ола, кытчӧдз лёк вӧчысь оз вешйы ме дінысь».

³ Ме чӧв олі, эг шыасьлы, эг сёрнит весиг бурыс йылысь, и менам сьӧлӧмӧй тырис шогӧн.

⁴ Менам сьӧлӧмӧй пондіс сотчыны, мӧвпъясӧй кутісны ыпъявны, сэки ме понді сёрнитны.

⁵ Господьӧй, висьтав меным олӧм помӧс, висьтав олан лунъяслысь лыдсӧ, мед ме тӧді ассьым нэмӧс.

⁶ Сӧмын весьт мында Тэ сетін меным олан лунъяс, и менам нэмӧй Тэнад син водзын нинӧм кодь. Дзик збыльысь, мортыдлӧн олӧмыс тӧвру пӧльыштӧм кодь.

⁷ Мортлӧн олӧмыс вуджӧр кодь. Весьшӧрӧ сійӧ мырсьӧ-пессьӧ да чукӧртӧ эмбурсӧ, но оз тӧд, кодлы тайӧ вичмас.

⁸ Господьӧй, мый меным виччысьны? Тэ вылӧ ме лача кута.

⁹ Мезды менӧ став менам мыжысь, эн лэдз мывкыдтӧм йӧзлы серавны ме вылын.

¹⁰ Ме чӧв ола, вомӧс ог восьтлы, ӧд ставыс тайӧ Тэсянь.

¹¹ Господьӧй, дугды менӧ дойдавны, Тэнад нӧйтӧмысь ме куланвыйын.

¹² Тэ кӧ мыж вӧчӧмысь янӧдан да мыждан мортӧс, сэки сылӧн мичлуныс бырас воз сёйӧм паськӧм моз. Быд мортлӧн олӧмыс тӧвру пӧльыштӧм кодь.

¹³ Господьӧй, кыв менсьым кевмысьӧмӧс, сибӧд менсьым кевмӧмӧс. Менам бӧрдігӧн эн тупкы пельтӧ, ӧд Тэ водзын ме йӧз муысь локтысь кодь, аслам батьяс моз ме бокыса морт кодь.

¹⁴ Ылыстчы ме дінысь, медым кулӧм водзвылын ме верми на нимкодясьыштны.