Псалтыр 37 - Коми Библия 2023

37 Псалом

¹ Давидлӧн псалом. Сьылӧны казьтылан вись вайигӧн [шойччан лунӧ].

² Господьӧй, эн янӧд менӧ лӧгалігад, эн мыжды менӧ скӧралігад.

³ Тэнад ньӧвъясыд сатшисны меӧ, Тэнад киыд личкӧ менӧ.

⁴ Тэнад скӧралӧмысь менам вир-яйын абу висьтӧминыс, менам мыж вӧсна лыясӧй оз ланьтлыны висьӧмысь.

⁵ Ӧд менам мыжъясӧй юрвывтыр, сьӧкыд ноп моз найӧ личкӧны менӧ.

⁶ Менам мывкыдтӧмлун вӧсна дойясӧй орзьӧмаӧсь, ӧвтӧны лёк дукӧн.

⁷ Ме мышкыртчи да дзикӧдз нюкыртчи, лунтыр ветлӧдла шогсьӧмӧн.

⁸ Менам пытшкӧсӧй ставнас сотчӧ, абу висьтӧминыс менам вир-яйын.

⁹ Ме дзикӧдз вынтӧмми да жугалі, сьӧкыда ружта сьӧлӧмпытшса дойысь.

¹⁰ Господьӧй, Тэ аддзан став менсьым кӧсйӧмӧс, кылан став менсьым ышлолалӧмӧс.

¹¹ Менам сьӧлӧмӧй чеччӧ, ме дзикӧдз вынтӧмми, менам синмӧй пемдіс.

¹² Дойясӧй вӧсна менам ёртъясӧй да муса йӧзӧй ылыстчисны меысь, менам матыссаяс ӧтдортчисны.

¹³ Менсьым олӧмӧс корсьысьяс октӧны меным нальк, меным лёксӧ вӧчны кӧсйысьяс мӧвпалӧны менӧ виӧм йылысь, найӧ быд лун наяна сёрнитӧны меным паныд.

¹⁴ Но ме лои пельтӧм, нинӧм ог кыв, сёрниттӧм морт моз нинӧм ог шу.

¹⁵ Ме лои пельтӧм морт кодь, ог кыв да ог вермы вочавидзны.

¹⁶ Господьӧй, Тэ вылӧ ме лача кута, Господьӧй Енмӧй, Тэ вочавидзан меным.

¹⁷ Ме шуи: «Эн сет мустӧмтысьяслы нимкодясьны, эн сет налы ышнясьны ме водзын, кор менам кокӧй лигышмунӧ.

¹⁸ Ме усянвыйын, ме дугдывтӧг шогся.

¹⁹ Ме висьтася аслам мыж вӧчӧмысь, шогся мыжӧй вӧсна.

²⁰ Но менӧ мустӧмтысьяс олӧны да вынсялӧны, унаӧн помкатӧг мустӧмтӧны менӧ.

²¹ Бурсьыс найӧ мынтысьӧны лёкӧн, ме бурсӧ кӧсъя, но найӧ мыжалӧны менӧ.

²² Господьӧй, эн эновт менӧ! Енмӧй, эн ылыстчы меысь!

²³ Господьӧй, менам Мездысьӧй, тэрмась отсавны меным!»