Псалтыр 35 - Коми Библия 2023

35 Псалом

¹ Сьылысьясӧн веськӧдлысьлы. Давидлӧн, Господьлӧн кесйӧглӧн, сьыланкыв.

² Мыжыс сёрнитӧ лёк вӧчысьлӧн сьӧлӧмас, Енсьыс полӧмыс сылӧн абу.

³ Ӧд мыжыс тупкӧма сылысь синсӧ, сійӧ оз аддзы да оз мустӧмт ассьыс мыжъяссӧ.

⁴ Сылӧн вомысь петӧны ылӧг да наян кывъяс, сійӧ оз кӧсйы вежӧрсявны да вӧчны бурсӧ.

⁵ Весиг вольпасяс куйлігӧн сійӧ мӧвпалӧ лёксӧ вӧчны, сійӧ сувтӧма мыжаяслӧн туй вылӧ, оз зывӧкты лёксӧ.

⁶ Господьӧй, Тэнад буралӧмыд – енэжӧдзыс, Тэнад збыльыд – кымӧръясӧдзыс.

⁷ Тэнад веськыдлуныд джуджыд керӧс кодь, Тэнад веськыда мыждӧмыд пыдӧстӧм саридз кодь. Господьӧй, Тэ видзан мортӧс да ыж-мӧскӧс.

⁸ Енмӧй, Тэнад буралӧмыд дона, Тэнад бордъяс улӧ йӧзыс сайӧдчӧны.

⁹ Найӧ пӧткӧдчӧны Тэнад керкаса озырлунӧн, Тэ юктӧдан найӧс Аслад юмов ваӧн.

¹⁰ Ӧд Тэсянь визувтӧ олӧм, Тэнад югыдад ми аддзам югыдсӧ.

¹¹ Енмӧй, нюжӧд Ассьыд буралӧмтӧ Тэнӧ тӧдысьяс дінӧ, петкӧдлы Ассьыд веськыдлунтӧ сӧстӧм сьӧлӧмаяслы.

¹² Вылӧ кыпӧдчысьлӧн кокыс мед оз тальышт менӧ, лёк вӧчысьлӧн киыс мед оз вӧтлы менӧ.

¹³ Видзӧдлы, лёк вӧчысьяс усисны! Енмыс уськӧдіс найӧс кок йывсьыныс, и найӧ оз вермыны сувтнысӧ. Ошкӧм.