Псалтыр 34 - Коми Библия 2023

34 Псалом

1 Давидлӧн псалом.

¹ Давидлӧн псалом. Господьӧй, вермась накӧд, кодъяс меным паныд сувтӧны, водзсась накӧд, кодъяс меным паныд водзсасьӧны.

² Босьт Ассьыд ичӧт да ыджыд сайӧдтӧ, лок меным отсӧг вылӧ.

³ Перйы Ассьыд шыпурттӧ да тупкы менӧ вӧтӧдысьяслысь туйсӧ. Шу менам ловлы, мый Тэ – менам Мездысьыс.

⁴ Менсьым олӧмӧс босьтны кӧсйысьяс мед яналасны да лоасны серамтуйынӧсь. Меным лёксӧ вӧчны кӧсйысьяс мед яналӧмӧн бӧр бергӧдчасны.

⁵ Мед найӧ лоӧны тӧвйыв шердйӧм кыд кодьӧсь, мед Господьлӧн анделыс вӧтлас найӧс.

⁶ Налӧн туйыс мед лоӧ пемыд да вильыд, и Господьлӧн анделыс мед вӧтчас на бӧрся.

⁷ Ме нинӧм лёксӧ эг вӧч, но найӧ пуктісны нальк, медым кыйны менӧ, кодйисны джуджыд гу, медым босьтны менсьым олӧмӧс.

⁸ Найӧс мед тӧдлытӧг суас бырӧдӧмыс, найӧ мед асьныс шедасны меным пуктӧм налькйӧ, усясны асланыс гуӧ.

⁹ Но менам лолӧй кутас нимкодясьны Господьӧн, кутас гажӧдчыны, ӧд Сійӧ мездіс менӧ.

¹⁰ Став менам лыясӧй шуӧны: «Господьӧй, Тэ кодь мӧдыс абу. Жебӧс Тэ мездан вынаысь, гӧльӧс да коньӧрӧс – сійӧс нартитысьысь».

¹¹ Ылӧг висьталысьяс чеччӧны ёрд вылын, юасьӧны менсьым, мый ог тӧд.

¹² Бурсьыс мынтысьӧны меным лёкӧн, ме коли дзик ӧтнам.

¹³ Налӧн висигӧн ме пасьтавлі шогалан паськӧм, тшыгъялі-видзалі да кевмыси став сьӧлӧмсянь.

¹⁴ Ме кевмысьлі на вӧсна, кыдзи ёрт либӧ вок вӧсна. Ме ветлі шогсьӧмӧн да юрӧс ӧшӧдӧмӧн, бӧрді мам вӧсна моз.

¹⁵ А кор ме крукасьлі, найӧ ӧтув чукӧртчӧмӧн нимкодясисны. Ӧтвыв сёрнитчӧмӧн найӧ дугдывтӧг лёкӧдісны менӧ, и мыйысь – ог тӧд,

¹⁶ пиньнысӧ йирӧмӧн найӧ наяна сералісны ме вылын.

¹⁷ Господьӧй, дыр-ӧ на Тэ кутан видзӧдны тайӧс? Видз менӧ налӧн лёк вӧчӧмысь, видз менсьым олӧмӧс тайӧ левъяссьыс.

¹⁸ Тэнад войтырлӧн ыджыд чукӧртчӧмын ме ошка Тэнӧ, уна йӧз пӧвстын ыдждӧдла Тэнӧ.

¹⁹ Эн сет мустӧмтысьяслы серавны ме вылын, ӧд ме мыжтӧм. Эн сет налы читкыравны синнысӧ, ӧд менам абу некутшӧм мыж.

²⁰ Найӧ сёрнитӧны оз бурасьӧм йылысь, а мӧвпалӧны му вылын лӧня олысьяслы лёксӧ вӧчны.

²¹ Найӧ вомнысӧ паськӧдӧмӧн шуалӧны меным паныд: «Тайӧ тадзи! Ми асланым синъясӧн аддзылім, мый вӧлі!»

²² Господьӧй, эн чӧв ов, Тэ ӧд аддзылін тайӧс, Ыджыдӧй, эн ылыстчы меысь.

²³ Господьӧй Енмӧй, садьмы-кыпӧдчы, веськыда мыжды да дорйы менӧ!

²⁴ Господьӧй, менам Енмӧй, мыжды менӧ Аслад веськыдлуныд серти. Найӧ мед оз нимкодясьны,

²⁵ мед оз шуны асланыс сьӧлӧмын, бур, тайӧс пӧ ми и кӧсйим. Найӧ мед оз ошйысьны, ми пӧ ньылыштім сійӧс.

²⁶ Мед яналасны да лоӧны серамтуйынӧсь найӧ, кодъяс нимкодясьӧны менам шогысь. Мед юръяндзим лоӧ ме водзын ошйысьысьяслы.

²⁷ Мед долыда нимкодясясны найӧ, кодъяс кӧсйӧны меным веськыда мыждӧмсӧ. Мед дугдывтӧг шуаласны: «Господь ыджыд! Сійӧ сетӧ Аслас кесйӧглы лӧнь олӧм».

²⁸ Ме юӧрта Тэнад веськыдлун йылысь, быд лун ошка Тэнӧ.