Псалтыр 33 - Коми Библия 2023

33 Псалом

¹ Давид лӧсьӧдіс тайӧ сьыланкывсӧ, кор лэччысис йӧй улӧ Авимелек водзын. Авимелек вӧтліс Давидӧс, и сійӧ муніс.

² Ошка Господьӧс быд кадӧ, менам вомысь дугдывтӧг петӧ Сылы ошкӧмыс,

³ менам лолӧй ошйысьӧ Господьӧн. Рам сьӧлӧмаяс кыласны тайӧс да кутасны нимкодясьны.

⁴ Ыдждӧдлӧй Господьӧс мекӧд, ӧтвылысь кыпӧдам Сылысь нимсӧ!

⁵ Ме шыаси Господь дінӧ, и Сійӧ вочавидзис меным, Сійӧ мездіс менӧ став полӧмысь.

⁶ Сы вылӧ видзӧдысьяслӧн чужӧмныс югдӧ, найӧ некор оз янавны.

⁷ Ме, коньӧр морт, шыаси Господь дінӧ, и Сійӧ кыліс менӧ да став шогсьыс мездіс менӧ.

⁸ Господьлӧн анделыс кытшалӧ Господьысь полысьясӧс, видзӧ да мездӧ найӧс.

⁹ Тӧдмалӧй Господьӧс, и аддзанныд, кутшӧм Сійӧ бур! Шуда сійӧ мортыс, коді лача кутӧ Господь вылӧ.

¹⁰ Полӧй Господьысь, Сылӧн вежа войтыр! Сыысь полысьяслӧн ставыс лоӧ тырмымӧн.

¹¹ Том левъяс сьӧкыдалӧны да тшыгъялӧны, а Господьӧс корсьысьяслӧн оз ло тырмытӧмыс.

¹² Локтӧй, челядь, кывзӧй менӧ! Ме велӧда тіянӧс овны Господьысь полӧмӧн.

¹³ Кӧсъян кӧ, мортӧй, кузь нэм овны да аддзыны шуда лунъяс,

¹⁴ кут ассьыд кывтӧ лёк сёрниысь, видз ассьыд вомтӧ пӧръясьӧмысь.

¹⁵ Ылыстчы лёксьыс да вӧч бурсӧ, корсь лӧньлунсӧ да кутчысь сэтчӧ.

¹⁶ Господьлӧн синмыс видзӧдӧ веськыда олысьяс вылӧ, Сылӧн пельыс кылӧ налысь горзӧмсӧ,

¹⁷ а лёк вӧчысьяслы Господь паныд сувтӧ, медым бырӧдны му вылысь на йылысь казьтылӧмсӧ.

¹⁸ Кор веськыда олысьяс шыасьӧны Господь дінӧ, Сійӧ кылӧ найӧс да мездӧ став налӧн шогсьыс.

¹⁹ Господь матын шогсьысь сьӧлӧмаяс дінӧ, ловнас усьӧмаясӧс Сійӧ мездӧ.

²⁰ Веськыда олысьлӧн уна шогыс, но Господь мездас сійӧс став шогсьыс.

²¹ Господь видзӧ сылысь лыяссӧ, весиг ӧти на пиысь оз чег.

²² Мыж вӧчысьӧс виас лёкыс. Коді мустӧмтӧ веськыда олысьӧс, сійӧс лоӧ мыждӧма.

²³ Господь видзас Аслас кесйӧгъяслысь олӧмсӧ, Сы вылӧ лача кутысьӧс оз ло мыждӧма. Ошкӧм.