Псалтыр 31 - Коми Библия 2023

31 Псалом

1 Давидлӧн сьыланкыв.

¹ Давидлӧн сьыланкыв. Шуда сійӧ, кодлысь лёк вӧчӧмъяссӧ прӧститӧма, мыжъяссӧ вевттьӧма.

² Шуда сійӧ мортыс, кодлысь мыжсӧ Господь оз казьтыв, кодлӧн сьӧлӧмас абу наянлуныс.

³ Кытчӧдз ме эг висьтав ассьым мыжӧс, менам лыясӧй косьмисны быдлунъя бӧрдӧмысь.

⁴ Лун и вой Тэнад киыд сьӧктӧдіс менӧ. Менам олан вынӧй бырис, кыдзи гожся пӧжигӧн косьмӧ веж турун.

⁵ Но ме восьті Тэныд ассьым мыжӧс, эг дзеб ассьым лёк вӧчӧмӧс. Ме шуи: «Висьтася Господьлы аслам лёк вӧчӧмысь», и Тэ прӧститін менсьым мыжӧс.

⁶ Эскана войтырыд мед кевмысяс Тэныд, кор позьӧ на шыасьны Тэ дінӧ. Сэки ыджыд валӧн ойдӧмыс оз су найӧс.

⁷ Тэ – менам сайӧдчаніныс. Тэ видзан менӧ шог дырйи, сетан меным нимкодясьны мездмӧмысь.

⁸ «Ме велӧда тэнӧ, – шуӧ Господь, – петкӧдла тэныд колана туйсӧ. Ме туйдӧда тэнӧ, Менам синмӧй видзӧдӧ тэ бӧрся.

⁹ Энӧ лоӧй асныра вӧвъяс да осёлъяс кодьӧсь, ӧд найӧс колӧ кӧртвомавны да домповодавны, медым найӧ кывзысисны».

¹⁰ Лёк вӧчысьӧс суӧ уна шог, а Господь вылӧ лача кутысьӧс кытшалӧ буралӧм.

¹¹ Веськыда олысьяс, гажӧдчӧй да нимкодясьӧй Господьӧн! Нимкодясьӧй, веськыд сьӧлӧмаяс! Ошкӧм.