Псалтыр 30 - Коми Библия 2023

30 Псалом

¹ Сьылысьясӧн веськӧдлысьлы. Давидлӧн псалом. [Шогсян кадӧ сьылӧм.]

² Господьӧй, Тэ вылӧ лача кута, ме некор ог янав. Аслад веськыдлуныд вӧсна мезды менӧ!

³ Копырт Ассьыд пельтӧ мелань, тэрмась мездыны менӧ! Ло меным изкыртаӧн да сайӧдчанінӧн, мезды менӧ!

⁴ Ӧд Тэ – менам зумыд изйыс да изкарыс. Аслад нимыд вӧсна нуӧд менӧ да веськӧдлы меӧн.

⁵ Мезды менӧ налькйысь, кодӧс гусьӧн октісны меным, ӧд Тэ – менам сайӧдчаніныс.

⁶ Тэнад киӧ сета Ассьым лолӧс. Тэ мездан менӧ, Господьӧй, эскана Енмӧй.

⁷ Идолъяслы юрбитысьясӧс мустӧмта, ме лача кута Господь вылӧ.

⁸ Кута нимкодясьны да гажӧдчыны Тэнад буралӧмысь, ӧд Тэ аддзин менсьым сьӧкыдалӧмӧс, аддзин менам ловлысь шогсьӧмсӧ.

⁹ Тэ эн сет менӧ мустӧмтысьяслӧн киӧ, Тэ петкӧдін менӧ паськыдінӧ.

¹⁰ Господьӧй, ло бур сьӧлӧма ме дінӧ, меным ӧд ёна сьӧкыд. Курыд шогысь жебмис менам синмӧй, топаліс менам лолӧй да пытшкӧсӧй.

¹¹ Шогын помасьӧ менам олӧмӧй, бӧрдӧмӧн тырӧма олан лунъясӧй. Аслам мыж вӧсна ме дзикӧдз вынтӧмми, менам лыясӧй косьмисны.

¹² Менӧ мустӧмтысьяс сералӧны ме вылын, орччӧн олысьяс лёкӧдӧны менӧ, тӧдсаяс зывӧктӧны менӧ, мекӧд паныдасьысьяс пышйӧны меысь.

¹³ Кулӧмаӧс моз менӧ вунӧдӧма, ме лои жугалӧм доз кодь.

¹⁴ Унаӧн лёкӧдӧны менӧ, быд боксянь повзьӧдлӧны, ӧтвылысь сёрнитчӧны меным паныд, кӧсйӧны босьтны менсьым лолӧс.

¹⁵ Господьӧй, Тэ вылӧ ме лача кута, шуа: «Тэ – менам Ен».

¹⁶ Тэнад киын менам олан лунъясӧй. Мезды менӧ мустӧмтысьясысь да вӧтлысьясысь,

¹⁷ петкӧдлы Аслад кесйӧглы югыд чужӧмбантӧ, мезды менӧ Аслад буралӧмыд вӧсна.

¹⁸ Господьӧй, ме ог янав Тэ дінӧ шыасьӧмысь. Лёк вӧчысьяс мед яналасны да ланьтасны пыдӧстӧминын.

¹⁹ Мед тупкасны вомнысӧ ылӧдчысьяс, кодъяс лёкӧдӧны веськыда олысьӧс, ышнясьӧмӧн да увтыртӧмӧн сёрнитӧны сылы паныд.

²⁰ Уна бурсӧ Тэ дасьтӧмыд Тэысь полысьяслы, йӧз водзын Тэ петкӧдлан бурлунтӧ Тэ вылӧ лача кутысьяслы.

²¹ Тэ Аснад вевттян найӧс йӧзлӧн лёк вӧчӧмысь, дзебан найӧс Аслад вевт улӧ йӧзлӧн омӧльтӧмысь.

²² Ме ошка Господьӧс, ӧд Сійӧ петкӧдліс меным Ассьыс шензьӧдана буралӧмсӧ, видзис менӧ изкарын.

²³ Майшасигӧн ме мӧвпышті: «Тэ вештін менӧ Аслад син водзысь». Но кор ме шыаси Тэ дінӧ, Тэ кылін менсьым кевмӧмӧс.

²⁴ Радейтӧй Господьӧс, Сылӧн эскана войтыр! Господь видзӧ Сылысь кывзысьысьясӧс, а вылӧ кыпӧдчысьяслы Сійӧ мынтысьӧ тырвыйӧ.

²⁵ Ёнмӧдчӧй, лоӧй зумыдӧсь, Господь вылӧ лача кутысьяс!