Псалтыр 29 - Коми Библия 2023

29 Псалом

¹ Давидлӧн псалом. Крам вежӧдігӧн сьылӧм.

² Господьӧй, ме ыдждӧдла Тэнӧ, ӧд Тэ кыпӧдін менӧ, эн сет менӧ мустӧмтысьлы нимкодясьны.

³ Господьӧй, менам Енмӧй, ме шыаси Тэ дінӧ, и Тэ бурдӧдін менӧ.

⁴ Господьӧй, Тэ петкӧдін менсьым лолӧс пыдӧстӧминысь, ловзьӧдін менӧ, и менӧ эз гуавны.

⁵ Сьылӧй Господьлы, Сылӧн эскана войтыр, ошкӧмӧн казьтывлӧй Сылысь вежалунсӧ.

⁶ Сылӧн скӧралӧмыс сӧмын здук кежлӧ, а бурлуныс – став олӧм чӧж. Рытнас кылӧ бӧрдӧм, а асывнас – нимкодясьӧм.

⁷ Кор менам ставыс вӧлі бур, ме шуи: «Ме некор ог усь».

⁸ Господьӧй, Аслад бурлуныд кузя Тэ сувтӧдін менӧ зумыд керӧс вылӧ, но кор дзебин Ассьыд чужӧмбантӧ, ме шӧйӧвоши.

⁹ Сэки ме шыаси Тэ дінӧ, Господьӧй, ме кевмыси аслам Ыджыдлы:

¹⁰ «Мый бурыс сыысь, ме кӧ кула да менӧ гуаласны? Кутас ӧмӧй шойыс ошкыны Тэнӧ, юӧртны, мый Тэныд позьӧ эскыны?

¹¹ Господьӧй, кыв менӧ, ло бур сьӧлӧма ме дінӧ. Господьӧй, отсав меным!»

¹² Менсьым шогсьӧмӧс Тэ бергӧдін йӧктӧм-гажӧдчӧмӧ, пӧрччӧдін ме вылысь шогалан паськӧмӧс да вӧньӧдін менӧ нимкодьлунӧн.

¹³ Та вӧсна ме дугдывтӧг сьыла Тэныд ошкӧмсӧ. Господьӧй, менам Енмӧй, кута помтӧг ошкыны Тэнӧ. Ошкӧм.