Псалтыр 28 - Коми Библия 2023

28 Псалом

1 Давидлӧн псалом. [Сьылӧны Чом вӧчан лунъяс помасигӧн.]

¹ Давидлӧн псалом. [Сьылӧны Чом вӧчан лунъяс помасигӧн.] Енэжвывса олысьяс, кыпӧдӧй ошкӧм Господьлы, ошкӧй-нимӧдӧй Господьӧс!

² Ошкӧй Господьлысь нимсӧ, копыртчӧй Господь водзӧ Сылӧн мича вежаинын!

³ Господьлӧн гӧлӧс шыыс ва весьтын, дзирдлуна Ен гымӧбтӧ, Господь лэдзӧ гӧлӧс шысӧ ыджыд ва весьтын.

⁴ Господьлӧн гӧлӧс шыыс вына, Господьлӧн гӧлӧс шыыс ён.

⁵ Господьлӧн гӧлӧс шыысь пӧрӧны сус пуяс, Господь чегъялӧ ливанса сус пуяс.

⁶ Сылӧн гӧлӧс шыысь вӧрзьывлӧны керӧсъяс, чеччалӧны куканьяс моз, Ливан да Сирион керӧсъяс чеччалӧны ӧшпиян моз.

⁷ Господьлӧн гӧлӧс шыыс лэдзӧ чардби.

⁸ Господьлӧн гӧлӧс шыысь вӧрзьывлӧ овтӧмин, Господь пыркнитлӧ Кадеш овтӧмин.

⁹ Господьлӧн гӧлӧс шыысь вайсьӧны кӧръяс, Сылӧн гӧлӧс шыысь кушмӧны вӧръяс. Сылӧн крамын ставныс гораа шуалӧны: «Ошкӧм Сылы!»

¹⁰ Господь ыджыдалӧ ваяс вылын, Господь ӧксыалӧ нэмъяс чӧж.

¹¹ Господь сетас Аслас войтырлы вын, Господь бурсиас Ассьыс войтырсӧ лӧньлунӧн.