Псалтыр 26 - Коми Библия 2023

26 Псалом

1 Давидлӧн псалом. [Давид лӧсьӧдіс тайӧ сьыланкывсӧ сійӧс ӧксыӧ мавтышттӧдз.]

¹ Давидлӧн псалом. [Давид лӧсьӧдіс тайӧ сьыланкывсӧ сійӧс ӧксыӧ мавтышттӧдз.] Господь – менам югыдыс, менӧ Мездысьыс. Кодысь меным повнысӧ? Господь – менсьым олӧмӧс Видзысьыс. Кодысь меным повнысӧ?

² Ме вылӧ кӧ уськӧдчасны лёк вӧчысьяс, мустӧмтысьяс да дзескӧдысьяс, медым косявлыны менсьым вир-яйӧс, найӧ асьныс крукасясны да усясны.

³ Ме вылӧ кӧ уськӧдчас тышкайӧз, менам сьӧлӧмӧй оз повзьы. Тышӧ кӧ петасны меным паныд, весиг сэки ме ог вошты лачаӧс.

⁴ Сӧмын ӧтитор ме кора Господьлысь, сӧмын ӧтитор ме кӧсъя: став олӧм чӧж овны Господьлӧн керкаын, аддзыны Господьлысь бурлунсӧ, юрбитны Сылӧн [вежа] крамын.

⁵ Шог дырйи Сійӧ дзебӧ менӧ Аслас крамӧ, видзӧ менӧ Аслас оланінын, кыпӧдӧ менӧ изкырта вылӧ.

⁶ Сэки ме лэпта юрӧс, ог кут повны менӧ кытшалысь вӧрӧгысь. Господьлӧн крамын вая Сылы висьяс, нимкодясьӧмӧн понда сьывны Сылы ошкӧм.

⁷ Господьӧй, кыв менсьым гӧлӧс шыӧс, кор ме шыася Тэ дінӧ. Ло бур сьӧлӧма ме дінӧ да вочавидз!

⁸ Ме ог вунӧд Тэнсьыд кывъястӧ. Тэ шуин: «Корсьӧй Менсьым чужӧмбанӧс». Господьӧй, ме кута корсьны Тэнсьыд чужӧмбантӧ.

⁹ Эн тупкы меысь Ассьыд чужӧмбантӧ, скӧралігад эн вӧтлы Ассьыд кесйӧгтӧ, ӧд Тэ – меным отсӧг сетысьыс. Енмӧй, менам Мездысьӧй, эн ӧтдорт, эн эновт менӧ!

¹⁰ Менам бать-мамӧй эновтісны менӧ, но Господь менӧ сибӧдӧ.

¹¹ Господьӧй, велӧд менӧ ветлыны Тэнад туйӧд, менӧ мустӧмтысьяс понда сувтӧд менӧ веськыд туй вылӧ.

¹² Эн сет менӧ налӧн киӧ, ӧд найӧ ылӧг висьталӧны ме йылысь, кӧсйӧны вины-дзескӧдны менӧ.

¹³ Но ме эска, мый ловъя дырйи на аддза Господьлысь бурлунсӧ.

¹⁴ Лача кут Господь вылӧ, ло зумыд да повтӧм! Лача кут Господь вылӧ! Ошкӧм.