Псалтыр 21 - Коми Библия 2023

21 Псалом

¹ Сьылысьясӧн веськӧдлысьлы. Кыа петігӧн сьылӧм. Давидлӧн псалом.

² Енмӧй, Енмӧй! [Кыв менӧ!] Мыйла Тэ эновтін менӧ? Ме горзӧмӧн шыася Тэ дінӧ, мед Тэ мездін менӧ, но Тэ ылын меысь.

³ Енмӧй, ме бӧрдӧмӧн шыася Тэ дінӧ луннас, но Тэ он вочавидз, шыася войнас, но меным кокньӧдыс абу.

⁴ Тэ вежа, Тэ олан Израиль войтыр пӧвстын, найӧ сьылӧмӧн ошкӧны Тэнӧ.

⁵ Миян батьяс Тэ вылӧ лача кутісны, Тэныд найӧ эскисны, и Тэ мездылін найӧс.

⁶ Найӧ горзӧмӧн шыасисны Тэ дінӧ, и мездмисны, Тэ вылӧ лача кутісны, и некор эз янавлыны.

⁷ Ме абу морт, а нидзув, йӧзыс омӧльтӧны менӧ, войтырӧй увтыртӧ менӧ.

⁸ Мекӧд аддзысигӧн ставныс лёкӧдӧны менӧ, юрнас довкйӧдлӧмӧн шуалӧны:

⁹ «Сійӧ лача кутіс Господь вылӧ. Шогмана кӧ сійӧ Господьлы, мед доръяс да мездас сійӧс».

¹⁰ Тэ петкӧдін менӧ мам кынӧмысь, видзин менӧ мам морӧс бердын.

¹¹ Чужӧмсянь ме Тэнад киын, мам кынӧмсянь Тэ – менам Ен.

¹² Эн ылыстчы меысь, ӧд шогыс матын, а отсӧг сетысьыс абу.

¹³ Уна ӧш чукӧртчисны ме гӧгӧр, васанса тшӧгӧдӧм ӧшъяс кытшалісны менӧ.

¹⁴ Найӧ паськӧдісны ассьыныс горшнысӧ равзысь лев моз, коді чашйӧ ассьыс кыйдӧссӧ.

¹⁵ Менам вынӧй визувтіс ва моз, став лыясӧй гользисны, сьӧлӧмӧй лои сывдӧм сись кодь, сыліс ме пытшкын.

¹⁶ Менам вынӧй дзикӧдз бырис, ме лои жугалӧм гырнич кодь, менам кывйӧй сибдіс горш бердӧ. Тэ сетін менӧ кулӧмыслӧн гыжъясӧ.

¹⁷ Менӧ кытшалісны понъяс, ме гӧгӧр чукӧртчисны лёк йӧз. Найӧ бытшкисны менсьым ки-кокӧс,

¹⁸ став лыясӧй тыдалӧны. Найӧ сералӧмӧн видзӧдӧны ме вылӧ,

¹⁹ ас костаныс юклӧны менсьым паськӧмӧс, пудъясьӧны менам дӧрӧм вӧсна.

²⁰ Господьӧй, эн ылыстчы меысь, Тэ – менам выныс, тэрмась отсавны меным!

²¹ Мезды менсьым олӧмӧс шыпуртысь, видз менӧ понъясысь!

²² Мезды менӧ левлӧн паськыд горшысь, видз менӧ ӧшъяслӧн сюръясысь! Вочавидз меным!

²³ Аслам вокъяслы юӧрта Тэнсьыд нимтӧ, Тэнад войтырлӧн чукӧртчӧмын ошка Тэнӧ.

²⁴ Господьысь полысьяс, ошкӧй Сійӧс! Яковсянь чужысьяс, нимӧдӧй Сійӧс! Израиль войтыр, вежавидзӧмӧн полӧй Сыысь!

²⁵ Ӧд Сійӧ эз увтырт шогсьысьӧс, эз кедзовт сьӧкыд нуысьӧс, эз дзеб Ассьыс чужӧмбансӧ, но кыліс Сы дінӧ шыасьысьӧс.

²⁶ Тэнад войтырлӧн ыджыд чукӧртчӧмын ме ошка Тэнӧ, Тэысь полысьяс водзын вая Тэныд кыв сетан вись.

²⁷ Мед пӧттӧдзныс сёясны гӧльяс, мед ошкасны Господьӧс Сійӧс корсьысьяс. Тіян сьӧлӧмныд мед тіпкас нэмъяс чӧж!

²⁸ Мувывса став йӧзыс кутасны казьтывлыны Господь йылысь да бергӧдчасны Сылань. Тэныд копыртчасны войтыръяс.

²⁹ Господь – Ӧксыыс, Сійӧ ыджыдалӧ войтыръяс вылын.

³⁰ Сылы кутасны копрасьны мувывса юралысьяс, Сылы копыртчасны ставныс, кодъяс кулӧны да бӧр муӧ пӧрӧны, кодъяс оз вермыны нюжӧдны ассьыныс олӧмсӧ.

³¹ Налӧн челядьыс кутасны кесъявны Господьлы, найӧс пыр кутасны шуны Сылӧн войтырӧн,

³² найӧ локтасны висьтавлыны Сылӧн веськыдлуныс йылысь, кутасны юӧртны водзӧ чужысьяслы Господьлӧн уджъясыс йылысь.