Псалтыр 20 - Коми Библия 2023

20 Псалом

¹ Сьылысьясӧн веськӧдлысьлы. Давидлӧн псалом.

² Господьӧй, ӧксы нимкодясьӧ Тэнад вынӧн, ёна гажӧдчӧ, мый Тэ мездін сійӧс.

³ Тэ сетін сылы, мый сьӧлӧмыс кӧсйис, сылысь корӧмсӧ эн ӧтдорт.

⁴ Озыра бурсиӧмӧн Тэ паныдалін сійӧс, пуктін сылы юр вылас зарни юркытш.

⁵ Сійӧ корис Тэнсьыд олӧм, и Тэ нюжӧдін сылысь олӧмсӧ, сетін сылы овны нэмъяс чӧж.

⁶ Сійӧс ёна ошкӧны, ӧд Тэ мездін сійӧс. Тэ сетін сылы нимавны да ыджыдавны,

⁷ бурсиин сійӧс нэмъяс кежлӧ. Тэ сетан сылы нимкодясьны Аслад чужӧмбан водзын.

⁸ Ӧксы кӧ лача кутӧ Господь вылӧ, сійӧ оз вӧрзьыв, ӧд Медвылыссаыс бур сьӧлӧма сы дінӧ.

⁹ Господьӧй, Тэнад киыд судзӧдас паныд сувтысьясӧс, Тэнад веськыд киыд вӧтӧдас Тэнӧ мустӧмтысьясӧс.

¹⁰ Скӧралігад Тэ сотан найӧс биа пачын моз, лӧгалігад бырӧдан найӧс, Господьӧй, и биыс ньылыштас найӧс.

¹¹ Тэ бырӧдан му вылысь налысь йылӧмсӧ, насянь чужысьясӧс Тэ бырӧдан йӧз пӧвстысь.

¹² Найӧ кыпӧдчисны Тэныд паныд, мӧвпыштісны лёксӧ, но налӧн нинӧм эз артмы.

¹³ Тэ сувтӧдан найӧс лыйсян пас пыдди, Аслад ньӧввужйысь лыйлан налы чужӧмас.

¹⁴ Господьӧй, кыпӧдчы Аслад вынӧн. Ми кутам сьылӧмӧн ошкыны Тэнсьыд ыджыд вынтӧ. Ошкӧм.