Псалтыр 2 - Коми Библия 2023

2 Псалом

Давидлӧн псалом.

¹ Мыйла шызьӧны войтыръяс, мыйла мӧвпалӧны ковтӧмсӧ?

² Мувывса ӧксыяс ӧтувтчӧны, ыджыдалысьяс кыпӧдчӧны Господьлы паныд да Сылӧн Мавтыштӧмалы паныд, шуӧны:

³ «Разям ас вылысь налысь кӧртӧдъяссӧ, шыбитам ас вылысь налысь чепъяссӧ!»

⁴ Но енэжъясын Олысь сералас на вылын, Господь янӧдас найӧс.

⁵ Аслас скӧрлунӧн Сійӧ повзьӧдас найӧс, дӧзмӧмӧн шуас налы:

⁶ «Ме мавтышті Ассьым Ӧксыӧс да сувтӧді Сійӧс Сионӧ, Менам вежа керӧс вылӧ».

⁷ Ме висьтала Господьлысь кывъяссӧ. Сійӧ шуис Меным: «Тэ – Менам Пи, талун Ме лои Тэныд Батьӧн.

⁸ Кор Менсьым, и Ме вичмӧда Тэныд войтыръясӧс, сета Тэнад кипод улӧ став муюгыдсӧ.

⁹ Тэ бырӧдан войтыръясӧс кӧрт беддьӧн, сёй дозмукӧс моз жуглан найӧс торпыригӧдз».

¹⁰ Сідзкӧ, вежӧрсялӧй, ӧксыяс! Лоӧй мывкыдаӧсь, мувывса ыджыдалысьяс!

¹¹ Кесъялӧй Господьлы полӧмпырысь, [Сы водзын] нимкодясьӧй вежавидзӧмӧн.

¹² Вылӧ пуктӧй Писӧ, медым Сійӧ эз скӧрмы, и медым ті энӧ кулӧй туй выланыд, ӧд Сылӧн скӧрлуныс регыд нин ыпнитас. Шудаӧсь Сы вылӧ лача кутысьяс.