Псалтыр 18 - Коми Библия 2023

18 Псалом

¹ Сьылысьясӧн веськӧдлысьлы. Давидлӧн псалом.

² Енэжыс висьталӧ Енлӧн дзирдлуныс йылысь, енэжвевтыс юӧртӧ Сылӧн киӧн вӧчӧмторъяс йылысь.

³ Лун юӧртӧ та йылысь лунлы, вой висьталӧ войлы.

⁴ Налӧн абу сёрниыс, абу кывъясыс, гӧлӧс шысӧ он кыв,

⁵ но став му пасьталаыс юргӧ налӧн гӧлӧс шыныс, муюгыдыслӧн медылі пельӧсӧдз воӧны налӧн кывъясыс. Сэні Енмыс вӧчис шонділы оланін.

⁶ Сэтысь шонді долыда петӧ, кыдзи верӧспу аслас гӧтрасян вежӧсысь, кыдзи панласьысь нимкодьпырысь котӧртӧ аслас туйӧд.

⁷ Сійӧ кытшовтӧ енэжсӧ помсянь помӧдзыс, и сылӧн шоныдыс быдӧнӧдз воӧ.

⁸ Господьлӧн Индӧдыс тырвыйӧ бур, ёнмӧдӧ ловтӧ. Господьлӧн туйдӧдӧмыс эскӧдана, вежӧрсьӧдӧ мывкыдтӧмӧс.

⁹ Господьлӧн тшӧктӧмъясыс веськыдӧсь, гажӧдӧны сьӧлӧмтӧ. Господьлӧн велӧдӧмыс югыд, югдӧдӧ синтӧ.

¹⁰ Господьысь полӧмыс сӧстӧм, олӧ нэмъяс чӧж. Господьлӧн мыждӧмыс збыль да ставнас веськыд.

¹¹ Господьлӧн тшӧктӧмъясыс зарниысь донаджыкӧсь, весиг уна весалӧм зарниысь, найӧ маысь на чӧскыдджыкӧсь.

¹² Тэнад тшӧктӧмъясыд видзӧны кесйӧгтӧ, на серти олӧмысь вичмӧ ыджыд тырдон.

¹³ Коді казялас ассьыс мыжъяссӧ? Господьӧй, весав менӧ гуся мыжъясысь,

¹⁴ видз Ассьыд кесйӧгтӧ тӧдӧмӧн мыж вӧчӧмысь, медым найӧ эз ыджыдавны ме вылын. Сэки ме ог сетчы лёкас, лоа сӧстӧм да мыжтӧм.

¹⁵ Господьӧй, мед лоӧны шогманаӧсь Тэныд менам кывъясӧй да сьӧлӧмпытшса мӧвпъясӧй. Тэ менӧ Дорйысьыс да Мездысьыс!