Псалтыр 16 - Коми Библия 2023

16 Псалом

1 Давидлӧн кевмысьӧм.

¹ Давидлӧн кевмысьӧм. Господьӧй, кывзы менсьым веськыда висьталӧмӧс, кыв менсьым гораа кевмысьӧмӧс, сибӧд менам ылӧдчытӧм вомсянь корӧм-кевмӧмӧс.

² Тэсянь мед петас менӧ веськыда мыждӧмыс, Тэнад синмыд мед аддзас веськыда вӧчӧмӧс.

³ Тэ видзӧдлан менам сьӧлӧмӧ, видлан менӧ войся кадӧ, тӧдмалан менӧ, но нинӧм лёксӧ он аддзы, ӧд менам мӧвпъясӧй оз торъявны кывъясысь.

⁴ Ме ола Тэнад кывъясыд серти, некодӧс ог дзескӧд, кыдзи мукӧдыс вӧчӧны.

⁵ Ёнмӧд менсьым воськовъясӧс, медым менам кокӧй эз кеж Тэнад туйысь.

⁶ Енмӧй, ме шыася Тэ дінӧ, ӧд Тэ вочавидзан меным. Копырт Ассьыд пельтӧ мелань да кыв менсьым кевмӧмӧс.

⁷ Мездысьӧй, петкӧдлы Ассьыд шензьӧдана буралӧмтӧ Тэ вылӧ лача кутысьяслы! Аслад веськыд киӧн Тэ мездан найӧс паныд сувтысьясысь.

⁸ Видз менӧ синмӧс моз, дзеб Аслад бордъяс улӧ

⁹ лёк вӧчысьясысь, кодъяс усьласьӧны ме вылӧ, дзеб мустӧмтысьясысь, кодъяс кытшалӧны менӧ.

¹⁰ Найӧ чорзьӧдӧмаӧсь сьӧлӧмнысӧ, тшапа сёрнитӧны,

¹¹ кыйӧдӧны менсьым быд воськов, медым кытшавны менӧ. Сюся видзӧдӧны ме бӧрся, медым ляскыны менӧ му вылӧ.

¹² Найӧ кыйдӧс вылӧ уськӧдчысь лев кодьӧсь, дзебсянінсянь кыйӧдчысь том лев кодьӧсь.

¹³ Господьӧй, чеччы да ӧлӧд лёк вӧчысьясӧс, уськӧд найӧс кок йывсьыныс. Аслад шыпуртӧн мезды менӧ наысь!

¹⁴ Господьӧй, Аслад киӧн мезды менӧ йӧзысь, кодъяс му вылас олігӧн босьтӧны ассьыныс пайнысӧ. Тэ пӧткӧдан найӧс Аслад ыджыд озырлунысь, сетан налы сы мында, мый налӧн челядьыс пӧтасны да нӧшта асланыс челядьлы колясны.

¹⁵ Понда видзӧдны Тэнад чужӧмбан вылӧ, ӧд Тэ водзын ме веськыд. Садьмӧм бӧрын понда пӧткӧдчыны Тэнад матілунӧн. Ошкӧм.