Псалтыр 149 - Коми Библия 2023

149 Псалом

¹ Аллилуйя! Сьылӧй Господьлы выль сьыланкыв, эскана войтырлӧн чукӧртчӧмын ошкӧй Сійӧс!

² Гажӧдчы, Израиль, тэнӧ Вӧчысь йылысь! Нимкодясьӧй, сионса олысьяс, асланыд Ӧксы йылысь!

³ Ошкӧй Сылысь нимсӧ йӧктӧмӧн, сьылӧй Сылы тимпанӧн да гуслиӧн ворсӧмӧн.

⁴ Ӧд Господь радейтӧ Ассьыс войтырсӧ, рам сьӧлӧмаясӧс мичмӧдӧ мездмӧмӧн.

⁵ Эскана войтыр мед гажӧдчас Сылӧн дзирдлун вӧсна, найӧ мед нимкодясясны вольпасьын куйліганыс.

⁶ Налӧн вомысь мед кыптас Енлы ошкӧмыс, кианыс мед босьтасны кыкнанладорсяньыс лэчтӧм шыпурт,

⁷ сыӧн мед водзӧс перъясны войтыръяслысь, мыждасны войтыръясӧс.

⁸ Найӧ мед кӧрталасны войтыръяслысь ӧксыяссӧ, мед дорасны чепъясӧн налысь юралысьяссӧ.

⁹ Тадзи лоӧ веськыда мыждӧма войтыръясӧс, кыдзи вӧлі гижӧма на йылысь. Тадзи лоӧ нимӧдӧма эскана войтырӧс. Аллилуйя!