Псалтыр 148 - Коми Библия 2023

148 Псалом

¹ Аллилуйя! Ошкӧй Господьӧс, енэжын олысьяс, ошкӧй Сійӧс выліын!

² Ошкӧй Сійӧс, став Сылӧн анделъяс, ошкӧй Сійӧс, став Сылӧн тышкакотыръяс!

³ Ошкӧй Сійӧс, шонді и тӧлысь, ошкӧй Сійӧс, дзирдалысь кодзувъяс!

⁴ Ошкӧй Сійӧс, вылысса енэжъяс, ошкӧй Сійӧс, енэжвевтса ваяс!

⁵ Найӧ мед ошкасны Господьлысь нимсӧ, ӧд [Сійӧ шуис, и найӧ лоины,] Сійӧ тшӧктіс, и найӧ артмисны.

⁶ Сійӧ сувтӧдіс найӧс нэмъяс кежлӧ, сетіс вежсьывлытӧм индӧдъяс.

⁷ Ошкӧй Господьӧс, му вылын олысьяс, саридзса гундыръяс да пыдӧстӧм ваяс!

⁸ Ошкӧй Сійӧс, би и шер, лым и ру, ошкы, Сылӧн тшӧктӧм серти пӧльтысь ыджыд тӧвныр!

⁹ Ошкӧй Сійӧс, керӧсъяс и мылькъяс, вотӧса пуяс и сус пуяс,

¹⁰ ыж-мӧс и зверъяс, гаг-веглясьысь и лэбач-пӧтка!

¹¹ Ошкӧй Сійӧс, ӧксыяс и войтыръяс, юралысьяс и мувывса ёрдысьяс,

¹² зонъяс и нывъяс, пӧрысьяс и томъяс!

¹³ Ставныс мед ошкасны Господьлысь нимсӧ, ӧд Сылӧн нимыс ставсьыныс медвылын, Сылӧн дзирдлуныс петкӧдчӧ му вылын и енэжын.

¹⁴ Сійӧ вынсьӧдіс Ассьыс войтырсӧ, медым Сійӧс ошкис Сылӧн эскана войтырыс, Израиль войтыр, коді матын Сылы. Аллилуйя!