Псалтыр 146 - Коми Библия 2023

146 Псалом

¹ Аллилуйя! Сьывны миян Енлы – бур, Сійӧс ошкӧмыс вайӧ нимкодьлун.

² Господь выльысь лэптӧ-кыпӧдӧ Ерусалим, Сійӧ бӧр чукӧртӧ разӧдӧм Израиль войтырӧс.

³ Сійӧ бурдӧдӧ доймӧм сьӧлӧмаясӧс, кӧрталӧ налысь дойяссӧ.

⁴ Сійӧ тӧдӧ кодзувъяслысь лыдсӧ, быдӧнлы сетӧма торъя ним.

⁵ Миян Господьным ыджыд да вына, Сылӧн мывкыдлуныс пыдӧстӧм.

⁶ Рам сьӧлӧмаӧс Господь кыпӧдӧ, а лёк вӧчысьӧс уськӧдӧ муӧдзыс.

⁷ Сьылӧй Господьлы, аттьӧалӧй Сійӧс, ворсӧй миян Енлы гуслиӧн.

⁸ Сійӧ вевттьӧ енэжсӧ кымӧръясӧн, мӧдӧдӧ му вылӧ зэр, керӧсъяс вылын быдтӧ турун [и мортлы сетӧ нянь].

⁹ Сійӧ пӧткӧдӧ ыж-мӧскӧс, вердӧ кравзысь кырныш пиянӧс.

¹⁰ Сійӧ оз видзӧд вӧвлӧн вынйӧр вылӧ, оз видзӧд мортлӧн ӧдйӧ котӧртӧм вылӧ.

¹¹ Господьлы мусаӧсь Сыысь полысьяс, Сылӧн буралӧм вылӧ лача кутысьяс.