Псалтыр 144 - Коми Библия 2023

144 Псалом

1 Давидлӧн ошкана сьыланкыв.

¹ Давидлӧн ошкана сьыланкыв. Енмӧй, менам Ӧксыӧй, кута ыдждӧдлыны Тэнӧ, кута ошкыны Тэнсьыд нимтӧ нэмъяс чӧж.

² Быд лун кута аттьӧавны Тэнӧ, кута ошкыны Тэнсьыд нимтӧ нэмъяс чӧж.

³ Господь ыджыд да ёна ошкана, Сійӧс шымыртны он вермы.

⁴ Чужысьяссянь чужысьясӧдз кутасны ошкыны Тэнсьыд уджъястӧ, кутасны юӧртны Тэнад ыджыд вын йылысь.

⁵ Ме тӧдмала-туяла Тэнсьыд дзирдлунтӧ да вынтӧ, Тэнсьыд шензьӧдана уджъястӧ,

⁶ кута висьтавлыны, кутшӧм Тэ ыджыд. Йӧзыс кутасны сёрнитны Тэнад уджъясыд йылысь, повзьӧдана да вына уджъясыд йылысь,

⁷ кутасны казьтывлыны Тэнад ыджыд бурлуныд йылысь, кутасны сьывны Тэнад веськыдлуныд йылысь.

⁸ Господь бур да мелі сьӧлӧма, Сійӧ дыр терпитӧ да ёна буралӧ.

⁹ Господь бур сьӧлӧма быдӧн дінӧ, Сійӧ буралӧ став Аслас вӧчӧмторйыс дінӧ.

¹⁰ Господьӧй, став Тэнад вӧчӧмторйыд мед аттьӧалас Тэнӧ, Тэнад эскана войтырыд мед ошкас Тэнӧ.

¹¹ Найӧ мед висьталасны Тэнад дзирдлуна юралӧмыд йылысь, мед юӧртасны Тэнад ыджыд выныд йылысь.

¹² Сэки йӧзыс тӧдмаласны Тэнсьыд вына уджъястӧ, Тэнсьыд дзирдлуна юралӧмтӧ.

¹³ Тэнад юралӧмыд помасьлытӧм, Тэнад ыджыдалӧмыд – чужысьяссянь чужысьясӧдз. [Господьлӧн кывъясыс эсканаӧсь, Сылӧн уджъясыс петкӧдлӧны Сылысь вежалунсӧ.]

¹⁴ Господь кутыштӧ нюкыртчӧмаӧс, Сійӧ лэптӧ усьӧмаӧс.

¹⁵ Господьӧй, ставныс видзӧдӧны Тэ вылӧ лача кутӧмӧн, Тэ сетан налы сёянсӧ ас кадӧ.

¹⁶ Тэ нюжӧдан китӧ да Аслад бурлуныд кузя пӧткӧдан став ловъя олысьсӧ.

¹⁷ Господь быдторйын веськыда вӧчӧ, Сійӧ кӧ кӧсйысьӧ, вӧчӧ.

¹⁸ Господь матын Сы дінӧ шыасьысьлы, сьӧлӧмсяньыс Сы дінӧ шыасьысьлы.

¹⁹ Господь вӧчӧ Сыысь полысьяслӧн кӧсйӧм серти, кылӧ налысь бӧрдӧмсӧ да мездӧ найӧс.

²⁰ Господь видзӧ Сійӧс радейтысьясӧс, а лёк вӧчысьясӧс бырӧдӧ.

²¹ Менам вомысь мед кыптас Господьлы ошкӧмыс! Став Сылӧн вӧчӧмторйыс мед ошкас Сылысь вежа нимсӧ нэмъяс чӧж! Ошкӧм.