Псалтыр 143 - Коми Библия 2023

143 Псалом

1 Давидлӧн псалом. [Голиафлы паныд.]

¹ Давидлӧн псалом. [Голиафлы паныд.] Ошкӧм Господьлы! Сійӧ – менам изкыртаыс. Сійӧ велӧдӧ менӧ тышкасьны, ёнмӧдӧ менсьым киӧс вермасьны.

² Сійӧ буралӧ ме дінӧ. Сійӧ – менӧ Дорйысьыс да Мездысьыс, менам дзебсяніныс да сайӧдыс. Сы вылӧ ме лача кута, Сійӧ сетӧ менам кипод улӧ менсьым войтырӧс.

³ Господьӧй, мортыс – коді сэтшӧмыс, мый Тэ казьтывлан сійӧс, мортлӧн пиыс – коді сэтшӧмыс, мый Тэ тӧждысян сы вӧсна?

⁴ Мортыс тӧвру пӧльыштӧм кодь, сылӧн олан лунъясыс бырӧны вуджӧр моз.

⁵ Господьӧй, доровт енэжсӧ да лэччы! Инмӧдчы керӧсъясӧ, и найӧ пондасны тшынавны.

⁶ Мӧдӧд Ассьыд чардбитӧ да разӧд паныд сувтысьясӧс! Лый Аслад гымньӧвйӧн, шӧйӧвошт найӧс!

⁷ Нюжӧд Ассьыд китӧ вылісянь, мезды менӧ да лэпты джуджыд ваысь, мезды менӧ локтысь йӧзлӧн киысь.

⁸ Налӧн вомысь петӧ ылӧгыс, кинысӧ лэптӧмӧн найӧ ылӧг кыв сетӧны.

⁹ Енмӧй, ме сьыла Тэныд выль сьыланкыв, кута ворсны Тэныд дас струнаа арфаӧн.

¹⁰ Тэ мездан ӧксыясӧс, Ассьыд Давид кесйӧгтӧ Тэ мездан лэчыд шыпуртысь.

¹¹ Дорйы да мезды менӧ локтысь йӧз киысь! Налӧн вомысь петӧ ылӧгыс, кинысӧ лэптӧмӧн найӧ ылӧг кыв сетӧны.

¹² Миян пиянным мед лоӧны пашкыр том пуяс кодьӧсь, нывъясным – ӧксылысь керкасӧ мичмӧдысь сюръяяс кодьӧсь.

¹³ Миян йӧртӧдъяс мед лоӧны тырӧсь, сэні мед тырыс лоӧ быдпӧлӧс сёяныс. Миян видзьяс вылын ыжъяс мед рӧдмасны сюрсъясӧн, налӧн лыдыс мед лоӧ лыдтӧм-тшӧттӧм.

¹⁴ Миян ӧшъяс мед лоӧны тшӧгӧсь, найӧс мед оз гусявны, найӧ мед оз вошны. Миян туйяс вылын мед оз кыв бӧрдӧм шы.

¹⁵ Шуда сійӧ войтырыс, кодлӧн ставыс тайӧ эм. Шуда сійӧ войтырыс, кодлӧн Енмыс эм Господь.