Псалтыр 142 - Коми Библия 2023

142 Псалом

1 Давидлӧн псалом. [Давид лӧсьӧдіс тайӧ сьыланкывсӧ, кор Авессалом пиыс вӧтлысис сы бӧрся.]

¹ Давидлӧн псалом. [Давид лӧсьӧдіс тайӧ сьыланкывсӧ, кор Авессалом пиыс вӧтлысис сы бӧрся.] Господьӧй, кыв менсьым кевмысьӧмӧс, кывзы менсьым кевмӧмӧс да вочавидз меным, ӧд Тэ эскана да веськыд!

² Эн мыжды Ассьыд кесйӧгтӧ, ӧд Тэ водзын веськыд мортыс абу.

³ Менӧ мустӧмтысь вӧтлысьӧ ме бӧрся, сійӧ няйтӧ талялӧ менсьым олӧмӧс, кулӧмаӧс моз йӧршитӧ менӧ пемыдінӧ.

⁴ Менам лолӧй дзикӧдз нюкыртчӧма, менам сьӧлӧмӧй полӧмӧйла топалӧма.

⁵ Ме казьтывла важ олӧмӧс, мӧвпала став Тэнад уджъяс йылысь, мый вӧчин Аслад киӧн.

⁶ Ме нюжӧда Тэлань ассьым киӧс, косьмӧм му моз менам лолӧй виччысьӧ Тэнӧ.

⁷ Господьӧй, тэрмась вочавидзны меным, ӧд ловнам ме дзикӧдз усьӧма. Эн тупкы меысь Ассьыд чужӧмбантӧ, медым ме эг ло кулӧм морт кодь.

⁸ Сет меным водз асывсянь кывны Тэнад буралӧмыд йылысь, ӧд Тэ вылӧ ме лача кута. [Господьӧй,] Тэлань ме веськӧда ассьым сьӧлӧмӧс, инды меным мунан туйсӧ.

⁹ Господьӧй, мезды менӧ мустӧмтысьясысь, Тэ дінын менам сайӧдчанінӧй.

¹⁰ Велӧд менӧ овны Тэнад кӧсйӧм серти, ӧд Тэ – менам Ен. Тэнад бур Лолыд мед нуӧдас менӧ веськыд туйӧд.

¹¹ Господьӧй, Аслад нимыд вӧсна ловзьӧд менӧ, Аслад веськыдлуныд вӧсна петкӧд менӧ шогысь.

¹² Аслад буралӧмыд кузя бырӧд менӧ мустӧмтысьясӧс, бырӧд менӧ дзескӧдысьясӧс, ӧд ме – Тэнад кесйӧг. Ошкӧм.