Псалтыр 140 - Коми Библия 2023

140 Псалом

1 Давидлӧн псалом.

¹ Давидлӧн псалом. Господьӧй, ме шыася Тэ дінӧ, тэрмась отсавны меным! Ме шыася Тэ дінӧ, кыв менсьым кевмӧмӧс!

² Менам кевмӧмӧй мед кыптас Тэ водзӧ ладан тшын моз, менам лэптӧм киӧй мед лоӧ Тэныд рытъя вись кодь.

³ Господьӧй, видз менсьым кывйӧс ковтӧм сёрниысь, кӧртвомав менсьым вомӧс.

⁴ Эн лэдз менам сьӧлӧмлы бергӧдчыны ылӧгас, эн сет меным лёк вӧчны мыж вӧчысьяскӧд ӧтвыв, эн сет меным пӧткӧдчыны налӧн чӧсмасян пызанысь.

⁵ Веськыда олысь мед чирыштас менӧ – тайӧ лоӧ меным бур вылӧ. Сійӧ мед янӧдас менӧ, ӧд тайӧ мавтыштан вый менам юрлы. Ме ог паныд сувт, дугдывтӧг кевмыся, медым мыжаяс эз вӧчны лёксӧ.

⁶ Кор налысь юралысьяссӧ лоӧ шыбитӧма изкырта вывсянь, найӧ гӧгӧрвоасны, мый менам кывъясӧй вӧліны небыдӧсь.

⁷ Найӧ шуасны, путкылялӧм эжа моз пӧ лыясным куйлӧны пыдӧстӧминлӧн дзиръя дорын.

⁸ Господьӧй Ыджыдӧй, ме лэпта синмӧс Тэлань, ме лача кута Тэ вылӧ, эн эновт менӧ!

⁹ Меным октӧмаӧсь лэч, видз менӧ сэтчӧ шедӧмысь, мезды менӧ лёк вӧчысьяслӧн налькйысь.

¹⁰ Найӧ мед асьныс шедасны асланыс тывъясӧ, а ме ордъя найӧс.