Псалтыр 14 - Коми Библия 2023

14 Псалом

1 Давидлӧн псалом.

¹ Давидлӧн псалом. Господьӧй, коді вермас лоны Тэнад оланінын? Коді вермас овны Тэнад вежа керӧс вылын?

² Сӧмын сійӧ, коді олӧ сӧстӧма, вӧчӧ веськыда да сьӧлӧмсяньыс висьталӧ збыльсӧ,

³ оз суклясь, оз вӧч лёксӧ орччӧн олысьлы, оз омӧльт мӧд мортӧс,

⁴ Господь водзын шогмытӧмаясӧс мустӧмтӧ, а Господьысь полысьясӧс пыдди пуктӧ. Сійӧ кутӧ ассьыс кывсӧ, весиг таысь кӧ ачыс сьӧкыдалӧ.

⁵ Сьӧмсӧ водзӧсӧн сетӧмысь сійӧ бӧрсӧ унджык оз босьт, козинъяс оз босьт, медым мыждыны мыжтӧм мортӧс. Тадзи вӧчысь некор оз усь.