Псалтыр 139 - Коми Библия 2023

139 Псалом

¹ Сьылысьясӧн веськӧдлысьлы. Давидлӧн псалом.

² Господьӧй, мезды менӧ лёк йӧзысь, видз менӧ виалысь-дзескӧдысьясысь!

³ Ас пытшканыс найӧ мӧвпалӧны лёксӧ вӧчны, быд лун найӧ зыксьӧны.

⁴ Налӧн кывйыс змейлӧн кодь чушкана, налӧн вомын змей яд.

⁵ Господьӧй, видз менӧ лёк вӧчысьясысь, дорйы менӧ виалысь-дзескӧдысьясысь, ӧд найӧ кӧсйӧны уськӧдны менӧ кок йылысь.

⁶ Вылӧ кыпӧдчысьяс октісны меным дзуг да лэч, туй вомӧн нюжӧдісны меным тыв да пуктісны нальк.

⁷ Ме шуи Господьлы: «Тэ – менам Ен. Господьӧй, кыв менсьым кевмӧмӧс».

⁸ Господьӧй Ыджыдӧй, Тэ – менам вына Мездысьӧй, Тэ вевттян менсьым юрӧс тыш дырйи.

⁹ Господьӧй, эн лэдз инны лёк вӧчысьяслӧн кӧсйӧмлы, эн лэдз збыльмыны вылӧ кыпӧдчысьяслӧн наян мӧвпъяслы.

¹⁰ Менӧ дзескӧдысьяслӧн лёк кывъясыс мед бергӧдчасны налы аслыныс паныд.

¹¹ На вылӧ мед киссясны биа ӧгыръяс! Найӧс мед шыбитасны би пытшкӧ, гуӧ, кытысь оз вермыны петнысӧ!

¹² Лёк сёрниа морт оз кут овны тайӧ му вылас, виалысь-дзескӧдысьӧс лёкыс бырӧдас.

¹³ Ме тӧда, мый Господь дорйӧ коньӧръясӧс, Сійӧ сувтӧ гӧльяс дор.

¹⁴ Збыльысь, веськыда олысьяс ошкӧны Тэнсьыд нимтӧ, сӧстӧм сьӧлӧмаяс олӧны Тэнад чужӧмбан водзын. Ошкӧм.