Псалтыр 138 - Коми Библия 2023

138 Псалом

1 Сьылысьясӧн веськӧдлысьлы. Давидлӧн псалом.

¹ Сьылысьясӧн веськӧдлысьлы. Давидлӧн псалом. Господьӧй, Тэ тӧдмалін менӧ да тӧдан менӧ.

² Тэ тӧдан, кор ме пукся и кор чечча. Тэ ылісянь на тӧдан менсьым мӧвпъясӧс.

³ Муна-ӧ ме, шойчча-ӧ, Тэ аддзан тайӧс, Тэ тӧдан менсьым туйясӧс.

⁴ Ме ог на удит вомӧс восьтны, но Тэ, Господьӧй, тӧдан нин, мый кӧсъя шуны.

⁵ Тэ кытшалан менӧ бӧрвывсянь и водзысянь, Тэнад киыд ме вылын.

⁶ Тэнад тӧдӧмлуныд шензьӧдӧ менӧ, сійӧ ёна вылын, ме ог вермы сійӧс вежӧрӧ тӧрӧдны.

⁷ Кытчӧ ме муна Тэнад Лов дінысь, кытчӧ пышъя Тэнад чужӧмбан водзысь?

⁸ Кыпӧдча кӧ енэжас – Тэ сэні, лэчча кӧ пыдӧстӧминас – Тэ тшӧтш сэні.

⁹ Лэбзя кӧ кыалӧн бордъяс вылын, овмӧдча кӧ саридз сайӧ,

¹⁰ и сэні Тэнад киыд нуӧдас менӧ, Тэнад веськыд киыд кутыштас менӧ.

¹¹ Шуа кӧ, мый пемыдыс вевттьӧ менӧ, югыдыс лои войӧн,

¹² но пемыдыс оз ло Тэныд пемыд, войыс Тэныд лун кодь югыд, пемыдыс и югыдыс Тэныд ӧткодьӧсь.

¹³ Тэ вӧчин менсьым пытшкӧсӧс, кыин менӧ мам кынӧмын.

¹⁴ Ме ошка Тэнӧ, ӧд ме шензьӧдана, Тэ вӧчин менӧ шензьӧдана ногӧн. Тэнад уджъясыд шензьӧданаӧсь, ме бура тӧда тайӧс.

¹⁵ Кор менӧ вӧчӧма вӧлі гусяинын, артмӧдӧма му пытшкын моз, менсьым лыясӧс абу вӧлі дзебӧма Тэнад синмысь.

¹⁶ Ме сӧмын на гӧрддзаси мам кынӧмын, но Тэнад синмыд аддзис нин менӧ. Став менсьым олан лунӧс Тэ урчитін, найӧс водзвыв вӧлі гижӧма Тэнад небӧгӧ.

¹⁷ Енмӧй, Тэнсьыд мӧвпъястӧ ме ог вермы тӧрӧдны, найӧ лыдтӧм-тшӧттӧмӧсь!

¹⁸ Позяс ӧмӧй найӧс лыддьынысӧ, ӧд налӧн лыдыс лыа дорысь на унджык? Ме садьма, и ме пыр на Тэкӧд.

¹⁹ Енмӧй, Тэ кӧ эськӧ бырӧдін лёк вӧчысьясӧс! Вешйӧй ме дінысь, вир кисьтысьяс!

²⁰ Тэнӧ мустӧмтысьяс висьталӧны ылӧгсӧ, Тэнсьыд нимтӧ весьшӧрӧ шуалӧны.

²¹ Господьӧй, Тэнӧ мустӧмтысьясӧс ме мустӧмта, Тэныд паныд кыпӧдчысьясӧс зывӧкта.

²² Ме ёна мустӧмта найӧс, лыддя найӧс аслам вӧрӧгӧн.

²³ Енмӧй, тӧдмав менӧ да видзӧдлы менам сьӧлӧмӧ, тӧдмав менӧ да менсьым мӧвпъясӧс.

²⁴ Видзӧдлы, ог-ӧ ме ветлы ылӧг туйӧд, да веськӧд менӧ Аслад туйыд вылӧ.