Псалтыр 136 - Коми Библия 2023

136 Псалом

¹ Ми пукалім вавилонса юяс дорын да бӧрдім, кор казьтывлім Сион йылысь.

² Ми ӧшлім ассьыным гуслияснымӧс юдорса бадьяс вылӧ.

³ Миянӧс пленӧ нуӧдысьяс тшӧктісны миянлы сьывны, миянӧс дзескӧдысьяс тшӧктісны гажӧдчыны. Найӧ шуалісны: «Сьылӧй миянлы сионса сьыланкывъяс!»

⁴ Но ми ӧмӧй вермам йӧз муын сьывны Господьлысь сьыланкывъяссӧ?

⁵ Ерусалим, ме кӧ вунӧда тэнӧ, менам веськыд киӧй мед вынтӧммас.

⁶ Ерусалим, ме кӧ вунӧда тэнӧ, ме кӧ ог кут нимкодясьны тэӧн, менам кывйӧй мед косьмас.

⁷ Господьӧй, эн вунӧд, мый Ерусалим кар бырӧдан лунӧ эдом войтыр горӧдіс: «Жугӧдӧй, жугӧдӧй сійӧс подулӧдзыс!»

⁸ Вавилон кар, тэнӧ лоӧ бырӧдӧма! Шуда сійӧ, коді водзӧсӧн мынтысяс тэныд сыысь, мый тэ вӧчин миянлы.

⁹ Шуда сійӧ, коді босьтас тэнсьыд ныв-питӧ да лясйӧдлас найӧс изйӧ. Ошкӧм.