Псалтыр 135 - Коми Библия 2023

135 Псалом

[Аллилуйя!]

¹ Ошкӧй Господьӧс, ӧд Сійӧ бур, Сылӧн буралӧмыс оз помасьлы.

² Ошкӧй енъяслысь Енсӧ, Сылӧн буралӧмыс оз помасьлы.

³ Ошкӧй ыджыдъяслысь Ыджыдсӧ, Сылӧн буралӧмыс оз помасьлы.

⁴ Ошкӧй Сійӧс, коді вӧчӧ ыджыд шензьӧданаторъяс, Сылӧн буралӧмыс оз помасьлы.

⁵ Сійӧ бур мывкыдӧн вӧчис енэжъяс, Сылӧн буралӧмыс оз помасьлы.

⁶ Сійӧ зумыда сувтӧдіс мусӧ ваяс вылӧ, Сылӧн буралӧмыс оз помасьлы.

⁷ Сійӧ вӧчис ыджыд югзьӧданторъяс, Сылӧн буралӧмыс оз помасьлы.

⁸ Вӧчис шонді, медым веськӧдлыны лунӧн, Сылӧн буралӧмыс оз помасьлы.

⁹ Вӧчис тӧлысь да кодзувъяс, медым веськӧдлыны войӧн, Сылӧн буралӧмыс оз помасьлы.

¹⁰ Сійӧ бырӧдіс Египетысь медводдза чужысьясӧс, Сылӧн буралӧмыс оз помасьлы.

¹¹ Сійӧ петкӧдіс Израиль войтырӧс Египетысь, Сылӧн буралӧмыс оз помасьлы.

¹² Сійӧ петкӧдіс найӧс вына кисӧ лэптӧмӧн, Сылӧн буралӧмыс оз помасьлы.

¹³ Сійӧ шӧрипӧв поткӧдіс Гӧрд саридз, Сылӧн буралӧмыс оз помасьлы.

¹⁴ Сійӧ нуӧдіс Израиль войтырӧс саридз шӧрӧд, Сылӧн буралӧмыс оз помасьлы.

¹⁵ Фараонӧс да сылысь тышкайӧзсӧ Сійӧ пӧдтіс Гӧрд саридзын, Сылӧн буралӧмыс оз помасьлы.

¹⁶ Сійӧ нуӧдіс Ассьыс войтырсӧ овтӧминӧд, Сылӧн буралӧмыс оз помасьлы.

¹⁷ Сійӧ пасьвартіс ыджыд ӧксыясӧс, Сылӧн буралӧмыс оз помасьлы.

¹⁸ Сійӧ виис вына ӧксыясӧс, Сылӧн буралӧмыс оз помасьлы.

¹⁹ Сійӧ виис Сигонӧс, аморейяслысь ӧксысӧ, Сылӧн буралӧмыс оз помасьлы.

²⁰ Виис Огӧс, васанса ӧксыӧс, Сылӧн буралӧмыс оз помасьлы.

²¹ Налысь мусӧ Сійӧ сетіс Израиль войтырлы, Сылӧн буралӧмыс оз помасьлы.

²² Сійӧ вичмӧдіс налысь мусӧ Аслас Израиль кесйӧглы, Сылӧн буралӧмыс оз помасьлы.

²³ Кор миянӧс увтыртісны, Сійӧ эз вунӧд миянӧс, Сылӧн буралӧмыс оз помасьлы.

²⁴ Сійӧ мездіс миянӧс дзескӧдысьясысь, Сылӧн буралӧмыс оз помасьлы.

²⁵ Быд ловъя олысьлы Сійӧ сетӧ сёян, Сылӧн буралӧмыс оз помасьлы.

²⁶ Ошкӧй енэжвывса Енмӧс, Сылӧн буралӧмыс оз помасьлы.