Псалтыр 134 - Коми Библия 2023

134 Псалом

¹ Аллилуйя! Ошкӧй Господьлысь нимсӧ! Господьлӧн кесйӧгъяс, ошкӧй Сійӧс!

² Ошкӧй Сійӧс, Господьлӧн крамын сулалысьяс, миян Енлӧн йӧръясын кесъялысьяс!

³ Ошкӧй Господьӧс, ӧд Сійӧ бур. Сьылӧмӧн ошкӧй Сылысь нимсӧ, ӧд Сылӧн нимыс мича.

⁴ Господь бӧрйис Аслыс Яковлысь котырсӧ, торйӧдіс аслыс Израиль войтырӧс.

⁵ Ме тӧда, мый Господь ыджыд, миян Господь став енсьыс на ыджыдджык.

⁶ Господь вӧчӧ, мый кӧсйӧ, енэжын и му вылын, саридзын и пыдӧстӧм ваын.

⁷ Му помсяньыс Сійӧ кыпӧдӧ кымӧръяс, зэригӧн сявкйӧ чардбиӧн, Аслас видзанінысь мӧдӧдӧ тӧвныр.

⁸ Господь бырӧдіс Египетысь медводдза чужысьясӧс – мортлысь и пемӧсъяслысь чужтассӧ.

⁹ Сійӧ петкӧдліс индысьпасъяс, вӧчис шензьӧданаторъяс египетса войтыр пӧвстын, фараонлӧн да сылӧн кесйӧгъяслӧн син водзын.

¹⁰ Сійӧ бырӧдіс войтыръясӧс, виис вына ӧксыясӧс:

¹¹ Сигонӧс – аморейяслысь ӧксысӧ, Огӧс – васанса ӧксыӧс. Сійӧ босьтіс Аслыс Ханаан му,

¹² сетіс сійӧс Аслас Израиль войтырлы.

¹³ Господьӧй, Тэнад нимыд олӧ нэмъяс чӧж, Тэнӧ кутасны казьтывлыны чужысьяссянь чужысьясӧдз.

¹⁴ Господь веськыда мыждӧ Ассьыс войтырсӧ, Сійӧ бурсьӧлӧмтчӧ Аслас кесйӧгъяс дінӧ.

¹⁵ Войтыръяслӧн идолъясыс – эзысьысь да зарниысь киӧн вӧчӧмторъяс.

¹⁶ Налӧн эм вом, но найӧ оз сёрнитны, налӧн эм син, но найӧ оз аддзыны,

¹⁷ налӧн эм пель, но найӧ оз кывны, налӧн вомысь оз пет ловшыыс.

¹⁸ На кодьӧсь жӧ лоӧны найӧс вӧчысьяс, тшӧтш на вылӧ лача кутысьяс.

¹⁹ Израиль войтыр, ошкы Господьӧс! Аарон рӧд, ошкы Господьӧс!

²⁰ Левий чужанкотыр, ошкы Господьӧс! Господьысь полысьяс, ошкӧй Господьӧс!

²¹ Ошкӧм сионса Господьлы, Ерусалимын Олысьлы! Аллилуйя!