Псалтыр 13 - Коми Библия 2023

13 Псалом

1 Сьылысьясӧн веськӧдлысьлы. Давидлӧн псалом.

¹ Сьылысьясӧн веськӧдлысьлы. Давидлӧн псалом. Мывкыдтӧм морт мӧвпалӧ, мый Енмыс абу. Йӧзыс сетчисны лёкас, олӧны зывӧка, бур вӧчысьыс абу.

² Господь енэжсяньыс видзӧдӧ йӧзыс вылӧ, медым аддзыны, эм-ӧ вежӧра мортыс, Енсӧ корсьысьыс.

³ Но ставныс кежӧмаӧсь, ӧтитӧг шогмытӧмӧсь, бур вӧчысьыс абу, весиг ӧтик абу.

⁴ Мыйла оз мывкыдсявны лёксӧ вӧчысьяс? Найӧ нянь моз сёйӧны менсьым войтырӧс, оз шыасьны Господь дінӧ.

⁵ Но найӧс полӧм босьтас, [кор нинӧмысь лоӧ повнысӧ,] ӧд Енмыс дорйӧ веськыда олысьясӧс.

⁶ Ті сераланныд гӧль морт вылын, но сійӧ лача кутӧ Господь вылӧ.

⁷ Сионысь мед воас Израильлы мездмӧмыс! Кор Господь бӧр бергӧдас Ассьыс войтырсӧ пленысь, сэки Яков кутас нимкодясьны, Израиль кутас гажӧдчыны. Ошкӧм.