Псалтыр 128 - Коми Библия 2023

128 Псалом

1 Крамӧ мунігӧн сьылӧм.

¹ Крамӧ мунігӧн сьылӧм. Том кадсянь менӧ ёна дзескӧдісны – мед шуас тадзи Израиль –

² том кадсянь менӧ ёна дзескӧдісны, но менӧ эз вермыны.

³ Менам мыш вылын быттьӧ гӧрисны гӧрысьяс, вӧчисны сэні кузь бӧрӧздаяс.

⁴ Но Господь веськыда вӧчӧ, мездӧ миянӧс лёк вӧчысьяслӧн чепъясысь.

⁵ Мед яналасны да пышъясны Сионӧс мустӧмтысьяс,

⁶ найӧ мед лоӧны керка вевт вылын быдмысь турун кодьӧсь, ытшкытӧдз косьмӧм турун кодьӧсь.

⁷ Вундысьлы сійӧ киас оз шед, кольта чукӧртысь оз чукӧрт сійӧс.

⁸ На дінті мунысьяс оз шуны: «Господьлӧн бурсиӧмыс мед лоӧ тіян вылын, ми бурсиам тіянӧс Господь нимӧн». Ошкӧм.