Псалтыр 118 - Коми Библия 2023

118 Псалом

[Аллилуйя!]

¹ Шудаӧсь сӧстӧма олысьяс, Господьлӧн Индӧдӧ кутчысьысьяс.

² Шудаӧсь Сылысь тшӧктӧмъяссӧ видзысьяс, став сьӧлӧмнас Сійӧс корсьысьяс.

³ Найӧ оз вӧчны лёксӧ, а ветлӧны Сылӧн туйясӧд.

⁴ Господьӧй, Тэ кӧсъян, медым ми зумыда кутчысим Тэнад тшӧктӧмъясӧ.

⁵ Ме кӧсъя Тэнад тшӧктӧмъяс серти овны, кӧсъя, медым туйясӧй вӧліны веськыдӧсь.

⁶ Ме кӧ тӧд вылын кута Тэнсьыд тшӧктӧмъястӧ, меным оз ло яндзим.

⁷ Ме ошка Тэнӧ став сьӧлӧмсянь, велӧдча гӧгӧрвоны Тэнсьыд веськыда мыждӧмтӧ.

⁸ Ме ола Тэнад тшӧктӧмъяс серти, сӧмын эн эновт менӧ.

⁹ Кыдзи вермас том зон видзны ассьыс олӧмсӧ сӧстӧмӧн? Тэнад кывйыд серти олӧмӧн.

¹⁰ Став сьӧлӧмӧн корсьыся Тэнӧ, эн лэдз меным кежны Тэнад тшӧктӧмъясысь.

¹¹ Аслам сьӧлӧмын ме видза Тэнсьыд кывтӧ, медым эг вӧч Тэныд паныд мыж.

¹² Ошкӧм Тэныд, Господьӧй! Велӧд менӧ Аслад тшӧктӧмъясӧ.

¹³ Став Тэнсьыд веськыда мыждӧмтӧ ме юӧрта йӧзыслы.

¹⁴ Кыдзи йӧзыс нимкодясьӧны озырлунӧн, сідзи жӧ меным нимкодь овны Тэнад тшӧктӧмъяс серти.

¹⁵ Ме тӧдмала-туяла Тэнсьыд тшӧктӧмъястӧ, тӧд вылам кута Тэнсьыд туйястӧ.

¹⁶ Ме бурмӧда сьӧлӧмӧс Тэнад индӧдъясӧн, ог вунӧд Тэнсьыд кывтӧ.

¹⁷ Петкӧдлы бурлунтӧ меным, Аслад кесйӧглы, и ме кута овны да видзны сьӧлӧмын Тэнсьыд кывтӧ.

¹⁸ Восьт менсьым синмӧс, медым ме аддзи, кутшӧм шензьӧдана Тэнад Индӧдыд.

¹⁹ Тайӧ му вылас ме йӧз муысь локтысь кодь, эн дзеб меысь Ассьыд тшӧктӧмъястӧ.

²⁰ Менам сьӧлӧмӧй ёна гажтӧмтчӧ, ме быд кадӧ виччыся Тэнсьыд веськыда мыждӧмтӧ.

²¹ Тэ раммӧдан вылӧ кыпӧдчысьясӧс, ёрӧмаясӧс, кодъяс кежӧны Тэнад тшӧктӧмъясысь.

²² Вешты ме вылысь лёкӧдӧмсӧ да омӧльтӧмсӧ, ӧд ме кутчыся Тэнад тшӧктӧмъясӧ.

²³ Юралысьяс пукалӧны да сёрнитчӧны меным паныд, но ме, Тэнад кесйӧгыд, видза Тэнсьыд тшӧктӧмъястӧ.

²⁴ Тэнад индӧдъясыд бурӧдӧны менсьым сьӧлӧмӧс, тшӧктӧмъясыд туйдӧдӧны менӧ.

²⁵ Ме дзикӧдз нюкыртчӧма, ловзьӧд менӧ Аслад кывйыд серти.

²⁶ Ме восьті Тэныд ассьым олан туйӧс, и Тэ кылін менӧ. Велӧд менӧ Аслад тшӧктӧмъясӧ.

²⁷ Гӧгӧрвоӧд меным Ассьыд тшӧктӧмъястӧ, медым тӧдны Тэнсьыд шензьӧданаторъястӧ.

²⁸ Шогӧйла менам лолӧй бӧрдӧ, ёнмӧд менӧ Аслад кывйыд серти.

²⁹ Эн сет меным кежны ылӧг туй вылӧ, велӧд менӧ Аслад Индӧдӧ, ло бур сьӧлӧма.

³⁰ Ме бӧрйи аслым збыль туй, Тэнсьыд веськыда мыждӧмтӧ ог вунӧд.

³¹ Ме кутчыся Тэнад индӧдъясӧ, Господьӧй, эн сет меным янавны!

³² Ме тэрмася ветлыны Тэнад тшӧктӧмъяслӧн туйӧд, Тэ кокньӧдан менсьым сьӧлӧмӧс.

³³ Господьӧй, велӧд менӧ Тэнад тшӧктӧмъяслӧн туйӧ, и ме кута ветлыны тайӧ туйӧдыс.

³⁴ Вежӧрсьӧд менӧ, и кута овны Тэнад Индӧдыд серти, кута кутчысьны сэтчӧ став сьӧлӧмӧн.

³⁵ Нуӧд менӧ Аслад тшӧктӧмъяслӧн туйӧд, ӧд тайӧ вайӧ меным нимкодьлун.

³⁶ Веськӧд менсьым сьӧлӧмӧс Тэнад индӧдъяслань, а эн озырмӧдчыны кӧсйӧмлань.

³⁷ Бергӧд синмӧс ковтӧмтор дінысь, ловзьӧд менӧ Аслад туй вылад.

³⁸ Вӧч меным, Аслад кесйӧглы, мый Тэ кӧсйысин Тэысь полысьяслы.

³⁹ Ылыст ме дінысь лёкӧдӧмсӧ, сійӧ повзьӧдлӧ менӧ. Но Тэнад веськыда мыждӧмыд – бур.

⁴⁰ Ме гажтӧмтча Тэнад тшӧктӧмъясысь, ловзьӧд менӧ Аслад веськыдлуннад.

⁴¹ Господьӧй, Тэнад буралӧмыд мед вичмас меным, мезды менӧ Аслад кывйыд серти!

⁴² Ме лача кута Тэнад кывйыд вылӧ, та вӧсна верма сетны воча кыв менӧ лёкӧдысьлы.

⁴³ Эн босьт менам вомысь збыль кывсӧ, ме лача кута Тэнад веськыда мыждӧм вылӧ.

⁴⁴ Тэнсьыд Индӧдтӧ пыр видза сьӧлӧмын, кута видзны сійӧс нэмъяс чӧж.

⁴⁵ Кута овны мездлунас, ӧд ме зіля овны Тэнад тшӧктӧмъяс серти.

⁴⁶ Ӧксыяс водзын ме ог яндысь, висьтала Тэнад индӧдъяс йылысь.

⁴⁷ Сьӧлӧмӧс бурмӧда Тэнад тшӧктӧмъясӧн, ӧд найӧ меным мусаӧсь.

⁴⁸ Ме нюжӧда киӧс Тэнад тшӧктӧмъяслань, найӧс ме радейта, найӧс кӧсъя тӧдны.

⁴⁹ Господьӧй, эн вунӧд Аслад кесйӧглы сетӧм кывтӧ, сы вылӧ ме лача кута.

⁵⁰ Тэнад сетӧм кывйыд ловзьӧдӧ менӧ, сійӧ бурӧдӧ менӧ шог дырйи.

⁵¹ Вылӧ кыпӧдчысьяс лёкӧдӧны менӧ, но ме ог кеж Тэнад Индӧдысь.

⁵² Господьӧй, ме ог вунӧд Тэнсьыд нэмӧвӧйся шуӧмъястӧ, найӧ бурӧдӧны менӧ.

⁵³ Ме ыпъяла-скӧрала лёк вӧчысьяс вылӧ, ӧд найӧ эновтӧмаӧсь Тэнсьыд Индӧдтӧ.

⁵⁴ Тэнад тшӧктӧмъясыд вӧліны менам сьыланкывйӧн му вывті ветліг-мунігӧн.

⁵⁵ Господьӧй, весиг войнас ме казьтывла Тэнсьыд нимтӧ, видза сьӧлӧмын Тэнсьыд Индӧдтӧ.

⁵⁶ Менам олан пайӧй – кутчысьны Тэнад тшӧктӧмъясӧ.

⁵⁷ Господьӧй, Тэ – менам олан пайӧй, ме шуи овны Тэнад кывъяс серти.

⁵⁸ Ме кевмыся Тэныд став сьӧлӧмсянь, ло бур сьӧлӧма ме дінӧ Аслад кывйыд серти.

⁵⁹ Ме мӧвпала аслам олан туй йылысь, веськӧда ассьым воськовъясӧс Тэнад тшӧктӧмъяслань.

⁶⁰ Ме тэрмася кутчысьны Тэнад тшӧктӧмъясӧ, ог нюжмась.

⁶¹ Лёк вӧчысьяс тывйыштӧны менӧ, но ме ог вунӧд Тэнсьыд Индӧдтӧ.

⁶² Войшӧрнас ме чеччывла Тэнӧ ошкыны Тэнад веськыда мыждӧмысь.

⁶³ Ме ёртася накӧд, кодъяс полӧны Тэысь, видзӧны Тэнсьыд тшӧктӧмъястӧ.

⁶⁴ Господьӧй, муыс тыр Тэнад буралӧмӧн. Велӧд менӧ Аслад тшӧктӧмъясӧ.

⁶⁵ Господьӧй, Аслад кесйӧглы Тэ бурсӧ вӧчин, Аслад кывйыд серти вӧчин.

⁶⁶ Сет меным бур мывкыд да тӧдӧмлун, ме лача кута Тэнад тшӧктӧмъяс вылӧ.

⁶⁷ Сьӧкыд нутӧдз ме вӧлі вошӧм морт, но ӧні ме кутчыся Тэнад кывъясӧ.

⁶⁸ Господьӧй, Тэ бур, Тэ вӧчан бурсӧ. Велӧд менӧ Аслад тшӧктӧмъясӧ!

⁶⁹ Вылӧ кыпӧдчысьяс пӧръясьӧны-суклясьӧны ме йылысь, но ме став сьӧлӧмсянь видза Тэнсьыд тшӧктӧмъястӧ.

⁷⁰ Найӧ тшапӧсь да вежӧртӧмӧсь, а ме бурмӧда сьӧлӧмӧс Тэнад Индӧдӧн.

⁷¹ Сьӧкыд нуӧмыс меным вӧлі бур вылӧ, та пыр ме велӧдчи Тэнад тшӧктӧмъясӧ.

⁷² Тэнад Индӧдыд меным ёна донаджык уна зарниысь да эзысьысь. Ошкӧм.

⁷³ Тэнад киыд вӧчис менӧ, пуктіс ставсӧ коланаинӧ. Вежӧрсьӧд менӧ, медым ме велӧдчи Тэнад тшӧктӧмъясӧ.

⁷⁴ Тэысь полысьяс нимкодясьӧны ме вӧсна, ӧд ме лача кута Тэнад кывйыд вылӧ.

⁷⁵ Господьӧй, ме тӧда, мый Тэнад шуӧмыд веськыд, Тэ веськыда мыждін менӧ.

⁷⁶ Тэнад буралӧмыд мед бурӧдас менӧ, кыдзи Тэ и кӧсйысьлін меным, Аслад кесйӧглы.

⁷⁷ Ло бур сьӧлӧма ме дінӧ, и ме кута овны. Тэнад Индӧдыд бурӧдӧ менӧ.

⁷⁸ Вылӧ кыпӧдчысьяс мед яналасны, ӧд найӧ некутшӧм помкатӧг дзескӧдӧны менӧ. Но ме тӧдмала-туяла Тэнсьыд тшӧктӧмъястӧ.

⁷⁹ Тэысь полысьяс мед бергӧдчасны ме дінӧ, найӧ, кодъяс тӧдӧны Тэнсьыд индӧдъястӧ.

⁸⁰ Мед эськӧ ме олі сӧстӧма, олі Тэнад тшӧктӧмъяс серти, сэки ме ог янав.

⁸¹ Менам лолӧй гажтӧмтчӧ Тэсянь мездмӧмсӧ виччысигӧн, ме лача кута Тэнад кывйыд вылӧ.

⁸² Ме гажтӧмтча Тэнсьыд кывтӧ виччысигӧн, ме юася, кор нин Тэ бурӧдан менӧ.

⁸³ Ме лои тшынын потласьӧм кучик доз кодь, но Тэнсьыд тшӧктӧмъястӧ ог вунӧд.

⁸⁴ Господьӧй, дыр-ӧ на меным, Тэнад кесйӧглы, виччысьнысӧ? Кор нин Тэ мыждан менӧ дзескӧдысьясӧс?

⁸⁵ Вылӧ кыпӧдчысьяс кодйисны меным гу, найӧ оз овны Тэнад Индӧд серти.

⁸⁶ Тэнад тшӧктӧмъясыд збыльӧсь. Отсав меным, ӧд менӧ дзескӧдӧны некутшӧм помкатӧг.

⁸⁷ Найӧ ӧдва эз бырӧдны менӧ тайӧ му вывсьыс, но Тэнсьыд тшӧктӧмъястӧ ме ог вунӧд.

⁸⁸ Аслад буралӧмыд кузя ловзьӧд менӧ, и ме кута видзны Тэнсьыд индӧдъястӧ.

⁸⁹ Господьӧй, Тэнад кывйыд олӧ нэмъяс чӧж, сійӧс вынсьӧдӧма енэжас.

⁹⁰ Чужысьяссянь чужысьясӧдз Тэ – эскана Ен, Тэ сувтӧдін мусӧ, и сійӧ сулалӧ.

⁹¹ Тэнад шуӧм серти ӧніӧдз ставыс зумыда сулалӧ, став вӧчӧмторйыс кесъялӧ Тэныд.

⁹² Тэнад Индӧдыд кӧ эз бурӧд менӧ, ме эськӧ кулі шогӧйла.

⁹³ Некор ог вунӧд Тэнсьыд тшӧктӧмъястӧ, на отсӧгӧн Тэ ловзьӧдан менӧ.

⁹⁴ Ме – Тэнад, мезды менӧ, ӧд ме кӧсъя овны Тэнад тшӧктӧмъяс серти.

⁹⁵ Лёк вӧчысьяс кыйӧдчӧны, медым вины менӧ, но ме тӧдмала-туяла Тэнсьыд индӧдъястӧ.

⁹⁶ Ме аддза, мый ставыс помасьӧ, но Тэнад тшӧктӧмъясыд вынаӧсь нэмъяс чӧж.

⁹⁷ Тэнад Индӧдыд меным ёна муса, быд лун ме тӧдмала-туяла сійӧс.

⁹⁸ Ме мывкыдаджык менӧ мустӧмтысьяс дорысь, ӧд Тэнад тшӧктӧмъясыд пыр мекӧд.

⁹⁹ Ме унджык гӧгӧрвоа аслам велӧдысьяс дорысь, ӧд ме тӧдмала-туяла Тэнсьыд индӧдъястӧ.

¹⁰⁰ Ме унджык тӧда олӧмаяс дорысь, ӧд ме кутчыся Тэнад тшӧктӧмъясӧ.

¹⁰¹ Ме видза ассьым кокӧс лёк туй вылӧ сувтӧмысь, ме кӧсъя кутчысьны Тэнад кывйӧ.

¹⁰² Тэнад веськыда мыждӧмысь ог кеж, Тэ велӧдан менӧ.

¹⁰³ Тэнад кывъясыд ёна чӧскыдӧсь, найӧ ма дорысь на юмовджыкӧсь.

¹⁰⁴ Аслад тшӧктӧмъясӧн Тэ вежӧрсьӧдан менӧ, та вӧсна ме мустӧмта ылӧг туйяс.

¹⁰⁵ Тэнад кывйыд – менам кокӧйлы югыдыс, сійӧ югдӧдӧ менсьым туйӧс.

¹⁰⁶ Ме кыв сеті да кута ассьым кывйӧс, кутчыся Тэнад веськыда мыждӧмӧ.

¹⁰⁷ Господьӧй, ме ёна сьӧкыдала, ловзьӧд менӧ Аслад кывйыд серти!

¹⁰⁸ Господьӧй, ас кӧсйӧм серти вайӧм висьӧс моз сибӧд менам вомысь ошкӧмсӧ. Велӧд менӧ Аслад тшӧктӧмъясӧ.

¹⁰⁹ Ме век куланвыйын, но Тэнсьыд Индӧдтӧ ог вунӧд.

¹¹⁰ Лёк вӧчысьяс меным нальк пуктісны, но ме ог кеж Тэнад тшӧктӧмъясысь.

¹¹¹ Ассьыд индӧдъястӧ Тэ вичмӧдін меным пыр кежлӧ, менам сьӧлӧмӧй нимкодясьӧ наӧн.

¹¹² Ме восьті ассьым сьӧлӧмӧс, медым овны Тэнад тшӧктӧмъяс серти олӧм помӧдз, нэмъяс чӧж.

¹¹³ Кык бана йӧзӧс ме мустӧмта, но Тэнад Индӧдыд меным муса.

¹¹⁴ Тэ – менам вевттьӧдыс да сайӧдыс, Тэнад кывйыд вылӧ ме лача кута.

¹¹⁵ Лёк вӧчысьяс, ылыстчӧй ме дінысь! Ме кута кутчысьны менам Енлӧн тшӧктӧмъясӧ.

¹¹⁶ Ёнмӧд менӧ Аслад кывйыд серти, и ме кута овны. Эн сет меным янавны сыысь, мый Тэ вылӧ ме лача кута.

¹¹⁷ Кутышт менӧ, и ме мездма, ме век кута мӧвпавны Тэнад тшӧктӧмъяс йылысь.

¹¹⁸ Тэнсьыд тшӧктӧмъястӧ вунӧдысьясӧс Тэ ӧтдортан, ӧд найӧ наяна пӧръясьӧны.

¹¹⁹ Ёгӧс моз Тэ чышкыштан му вылысь став лёк вӧчысьсӧ, та вӧсна меным мусаӧсь Тэнад тшӧктӧмъясыд.

¹²⁰ Тэысь полӧмӧйла ставнас вир-яйӧй дзӧрӧ, ме пола Тэнад мыждӧмысь.

¹²¹ Ме ола веськыдлуныд серти, эн коль менӧ дзескӧдысьяслӧн киӧ!

¹²² Дорйы менӧ, Ассьыд кесйӧгтӧ, медым меным вӧлі бур. Эн сет вылӧ кыпӧдчысьяслы дзескӧдны менӧ!

¹²³ Ме гажтӧмтча Тэсянь мездмӧмсӧ виччысигӧн, гажтӧмтча Тэнсьыд веськыд кывтӧ виччысигӧн.

¹²⁴ Вӧч меным, Аслад кесйӧглы, буралӧм сертиыд, велӧд менӧ Аслад тшӧктӧмъясӧ.

¹²⁵ Вежӧрсьӧд менӧ, Ассьыд кесйӧгтӧ, медым ме гӧгӧрвои Тэнсьыд индӧдъястӧ.

¹²⁶ Господьӧй, кад нин вӧчны мыйкӧ, ӧд Тэнсьыд Индӧдтӧ торкалӧны!

¹²⁷ А меным мусаӧсь Тэнад тшӧктӧмъясыд, ме радейта найӧс зарни дорысь ёнджыка, сӧстӧм зарниысь на ёнджыка.

¹²⁸ Тэнад тшӧктӧмъяс серти ме ола, а ылӧг туйяс мустӧмта.

¹²⁹ Тэнад индӧдъясыд шензьӧданаӧсь, та вӧсна ме видза найӧс.

¹³⁰ Кор Тэнад кывйыд воссьӧ, сійӧ югдӧдӧ-вежӧрсьӧдӧ мывкыдтӧмӧс.

¹³¹ Кыдзи горш косьмигӧн ме ёна кӧсъя юны ва, тадзи ме гажтӧмтча Тэнад тшӧктӧмъясысь. Ошкӧм.

¹³² Видзӧдлы ме вылӧ да ло бур сьӧлӧма ме дінӧ, кыдзи Тэ буралан Тэнсьыд нимтӧ радейтысьяс дінӧ.

¹³³ Аслад кывйӧн ёнмӧд менсьым воськовъясӧс, эн лэдз лёкыслы ыджыдавны ме вылын.

¹³⁴ Мезды менӧ дзескӧдысьясысь, и ме кута видзны Тэнсьыд тшӧктӧмъястӧ.

¹³⁵ Петкӧдлы Аслад кесйӧглы югыд чужӧмбантӧ, велӧд менӧ Аслад тшӧктӧмъясӧ.

¹³⁶ Менам синваӧй шорӧн визувтӧ, ӧд йӧзыс оз кутчысьны Тэнад Индӧдӧ.

¹³⁷ Господьӧй, Тэ веськыда вӧчан, Тэнад мыждӧмыд веськыд.

¹³⁸ Тэ сетін миянлы тшӧктӧмъяс, найӧ тырвыйӧ збыльӧсь да веськыдӧсь.

¹³⁹ Скӧрӧйла менам пытшкӧсӧй ставнас пуӧ, ӧд менӧ мустӧмтысьяс вунӧдӧмаӧсь Тэнсьыд кывъястӧ.

¹⁴⁰ Тэнад кывйыд тырвыйӧ сӧстӧм, Тэнад кесйӧгыд радейтӧ сійӧс.

¹⁴¹ Ме коньӧр да увтыртӧм морт, но Тэнсьыд тшӧктӧмъястӧ ме ог вунӧд.

¹⁴² Тэнад веськыдлуныд олӧ нэмъяс чӧж, Тэнад Индӧдыд – збыль.

¹⁴³ Шог да сьӧкыдалӧм суисны менӧ, но Тэнад тшӧктӧмъясыд бурӧдӧны менӧ.

¹⁴⁴ Тэнад индӧдъясыд век веськыдӧсь. Вежӧрсьӧд менӧ, и ме кута овны.

¹⁴⁵ Господьӧй, став сьӧлӧмсянь ме шыася Тэ дінӧ, вочавидз меным, и ме кута видзны Тэнсьыд тшӧктӧмъястӧ.

¹⁴⁶ Ме кора Тэнӧ: мезды менӧ! И ме кута кутчысьны Тэнад индӧдъясӧ.

¹⁴⁷ Кыа петтӧдз на ме шыася Тэ дінӧ, Тэнад кыв вылӧ лача кута.

¹⁴⁸ Войыс оз на коль, а менам синмӧй восьса нин, медым тӧдмавны Тэнсьыд кывтӧ.

¹⁴⁹ Господьӧй, Аслад буралӧмыд кузя кыв гӧлӧс шыӧс, Аслад веськыда мыждӧмыд серти ловзьӧд менӧ.

¹⁵⁰ Лёксӧ вӧчны кӧсйысьяс матыстчӧны ме дінӧ, найӧ ылынӧсь Тэнад Индӧдысь.

¹⁵¹ Господьӧй, Тэ матын ме дінӧ. Став Тэнад тшӧктӧмыд – збыль.

¹⁵² Важысянь ме тӧда Тэнсьыд индӧдъястӧ, тӧда, Тэ сетін найӧс пыр кежлӧ.

¹⁵³ Видзӧдлы менам сьӧкыдалӧм вылӧ да мезды менӧ, ӧд ме ог вунӧд Тэнсьыд Индӧдтӧ.

¹⁵⁴ Сувт ме дор да мезды менӧ, ловзьӧд менӧ Аслад кывйыд серти.

¹⁵⁵ Ентӧг олысьяс ылынӧсь мездмӧмсьыс, ӧд найӧ оз кутчысьны Тэнад тшӧктӧмъясӧ.

¹⁵⁶ Господьӧй, Тэнад буралӧмыд вывті ыджыд, ловзьӧд менӧ Аслад веськыда мыждӧмыд серти.

¹⁵⁷ Менӧ дзескӧдысьыс да мустӧмтысьыс вывті уна, но Тэнад индӧдъясысь ме ог ылыстчы.

¹⁵⁸ Меным зывӧк аддзыны Тэысь кежысьясӧс, ӧд найӧ оз овны Тэнад кывйыд серти.

¹⁵⁹ Видзӧдлы, кутшӧма ме радейта Тэнсьыд тшӧктӧмъястӧ. Господьӧй, Аслад буралӧмыд кузя ловзьӧд менӧ.

¹⁶⁰ Тэнад кывйыд подуласьӧ збыль вылас, Тэнад веськыда мыждӧмыд вына нэмъяс чӧж.

¹⁶¹ Юралысьяс помкатӧг дзескӧдӧны менӧ, но менам сьӧлӧмӧй полӧ-тіралӧ Тэнад кывйысь.

¹⁶² Ыджыд озырлун босьтысь моз ме нимкодяся Тэнад кывйӧн.

¹⁶³ Ме мустӧмта-зывӧкта ылӧгсӧ, но Тэнсьыд Индӧдтӧ радейта.

¹⁶⁴ Сизимысь луннас ошка Тэнӧ веськыда мыждӧмсьыд.

¹⁶⁵ Тэнсьыд Индӧдтӧ радейтысьяслӧн эм лӧньлун, найӧ некор оз крукасьны.

¹⁶⁶ Господьӧй, ме лача кута Тэсянь мездмӧм вылӧ, ме ола Тэнад тшӧктӧмъяс серти.

¹⁶⁷ Ме видза Тэнсьыд индӧдъястӧ, найӧ меным ёна мусаӧсь.

¹⁶⁸ Ме кутчыся Тэнад индӧд-тшӧктӧмъясӧ, менам олан туйясӧй Тэнад син водзынӧсь.

¹⁶⁹ Господьӧй, менам кевмысьӧмӧй мед воас Тэ водзӧ, Аслад кывйыд серти вежӧрсьӧд менӧ!

¹⁷⁰ Менам кевмӧмӧй мед воас Тэ водзӧ, Аслад кывйыд серти мезды менӧ!

¹⁷¹ Менам вомысь кыптӧ Тэныд ошкӧмыс, ӧд Тэ велӧдан менӧ Аслад тшӧктӧмъясӧ.

¹⁷² Аслам вомӧн ме юӧрта Тэнсьыд кывтӧ, ӧд Тэнад тшӧктӧмъясыд веськыдӧсь.

¹⁷³ Тэнад киыд мед отсалас меным, ӧд ме бӧрйи Тэнсьыд тшӧктӧмъястӧ.

¹⁷⁴ Господьӧй, ме виччыся Тэсянь мездмӧмсӧ, Тэнад Индӧдыд бурӧдӧ менӧ.

¹⁷⁵ Сет меным овны, медым ме ошки Тэнӧ, Тэнад веськыда мыждӧмыд мед отсалас меным.

¹⁷⁶ Вошӧм ыж моз ме ылалі. Корсь менӧ, Ассьыд кесйӧгтӧ, ӧд Тэнсьыд тшӧктӧмъястӧ ме ог вунӧд. Ошкӧм.