Псалтыр 117 - Коми Библия 2023

117 Псалом

[Аллилуйя!]

¹ Ошкӧй Господьӧс, ӧд Сійӧ бур, Сылӧн буралӧмыс оз помасьлы.

² Израиль войтыр мед шуас: «[Сійӧ бур,] Сылӧн буралӧмыс оз помасьлы».

³ Ааронлӧн котыр мед шуас: «[Сійӧ бур,] Сылӧн буралӧмыс оз помасьлы».

⁴ Господьысь полысьяс мед шуасны: «[Сійӧ бур,] Сылӧн буралӧмыс оз помасьлы».

⁵ Ёна сьӧкыдалігӧн ме шыаси Господь дінӧ. Сійӧ кыліс менӧ да петкӧдіс паськыдінӧ.

⁶ Господь ме дор, меным нинӧмысь повнысӧ. Мый вӧчас меным морт?

⁷ Господь – меным отсӧг сетысьыс, кута повтӧг видзӧдны менӧ мустӧмтысьяс вылӧ.

⁸ Бурджык Господь вылӧ лача кутны морт вылӧ лача кутӧм дорысь.

⁹ Бурджык Господь вылӧ лача кутны ӧксыяс вылӧ лача кутӧм дорысь.

¹⁰ Менӧ кытшалісны войтыръяс, но Господь нимӧн ме пасьварті найӧс.

¹¹ Найӧ быд боксянь кытшалісны менӧ, но Господь нимӧн ме пасьварті найӧс.

¹² Кытшалісны менӧ зі чукӧр моз, но биын сотӧм лежнӧг моз бырисны. Господь нимӧн ме пасьварті найӧс.

¹³ Найӧ ёна тойыштісны менӧ, медым ме уси, но Господь кутыштіс менӧ.

¹⁴ Господь – менам вынӧй да сьыланкывйӧй, Сійӧ мездіс менӧ.

¹⁵ Веськыда олысьяслӧн керкаясын кылӧ мездмӧм йылысь нимкодясян шы: «Господьлӧн веськыд киыс вӧчӧ ыджыд уджъяс!

¹⁶ Господь веськыд кисӧ вылӧ кыпӧдӧма, Господьлӧн веськыд киыс вӧчӧ ыджыд уджъяс!»

¹⁷ Ме ог кув, но кута овны да висьтавлыны Господьлӧн уджъяс йылысь.

¹⁸ Господь чорыда мыждіс менӧ, но эз лэдз меным кувны.

¹⁹ Восьтӧй меным веськыдлуныслысь дзиръясӧ! Ме пыра сэті да понда ошкыны Господьӧс.

²⁰ Со, Господьлӧн дзиръяыс, веськыда олысьяс пырасны сэті.

²¹ Господьӧй, ме ошка Тэнӧ! Тэ кылін менӧ да мездін менӧ.

²² Изйыс, кодӧс ӧтдортісны керка лэптысьяс, лоис пельӧс изйӧн.

²³ Тайӧ Господьсянь да шензьӧдӧ миянӧс.

²⁴ Тайӧ лунсӧ вӧчис Господь, кутам нимкодясьны да гажӧдчыны!

²⁵ Господьӧй, мезды миянӧс! Господьӧй, отсав миянлы!

²⁶ Бурсиӧма Господь нимӧн локтысьӧс! Господьлӧн керкасянь ми бурсиам тіянӧс.

²⁷ Господь эм Ен, Сійӧ югдӧдіс миянӧс. Гажӧдчан лунӧ вайӧдӧй ыж-мӧснытӧ, висьпуктанінлӧн сюръясӧ кӧрталӧй висьнытӧ.

²⁸ Тэ – менам Ен, ме ошка Тэнӧ, Енмӧй, ме ыдждӧдла Тэнӧ! [Кута ошкыны Тэнӧ, ӧд Тэ кылін да мездін менӧ.]

²⁹ Ошкӧй Господьӧс, ӧд Сійӧ бур, Сылӧн буралӧмыс оз помасьлы! Ошкӧм.