Псалтыр 114 - Коми Библия 2023

114 Псалом

[Аллилуйя!]

¹ Ме нимкодяся, ӧд Господь кыліс менсьым гӧлӧс шыӧс, кыліс менсьым кевмӧмӧс.

² Сійӧ копыртіс мелань пельсӧ, та вӧсна став олӧм чӧж кута шыасьны Сы дінӧ.

³ Кулӧмыс тывйыштіс менӧ, пыдӧстӧминлӧн шогыс суис менӧ, сьӧкыдлуныс да шогыс личкисны менӧ.

⁴ Сэки ме шыаси Господь дінӧ: «Господьӧй, мезды менӧ!»

⁵ Господь бур сьӧлӧма, Сійӧ веськыда вӧчӧ, миян Енным мелі сьӧлӧма.

⁶ Господь видзӧ восьса сьӧлӧмаясӧс. Кор ме вынтӧмми, Сійӧ отсаліс меным.

⁷ Шойччы, менам лолӧй, ӧд Господь тӧждысьӧ тэ вӧсна.

⁸ Господьӧй, Тэ мездін менӧ кулӧмысь, менсьым синмӧс – синваысь, менсьым кокӧс – крукасьӧмысь. Ловъяяслӧн му вылын ме кута овны Господь водзын. Ошкӧм.