Псалтыр 113 - Коми Библия 2023

113 Псалом

[Аллилуйя!]

¹ Кор Израиль войтыр петіс Египетысь, Яковлӧн рӧдыс – йӧз муысь,

² сэки Иуда му лои Господьлӧн вежаинӧн, Израиль му – Сылӧн юраланінӧн.

³ Тайӧс аддзӧмысь саридз пышйис, Йӧрдан ю кутіс мӧдарӧ визувтны.

⁴ Керӧсъяс кутісны межъяс моз чеччавны, мылькъяс – баляяс моз.

⁵ Саридз, мыйла тэ пышъян? Йӧрдан, мыйла тэ мӧдарӧ визувтан?

⁶ Керӧсъяс, мыйла ті чеччаланныд межъяс моз, а ті, мылькъяс, – баляяс моз?

⁷ Мед тіралас муыс Господьлӧн чужӧмбан водзын, Яковлӧн Ен водзын!

⁸ Изкыртаысь Сійӧ вӧчӧ ты, изйысь – ва петанін.

⁹ Господьӧй, эн миянӧс нимӧд, а Ассьыд нимтӧ, ӧд буралӧмыс да збыльыс – Тэнад.

¹⁰ Мыйла лэдзан войтыръяслы шуасьны: «Кӧні налӧн Енмыс?»

¹¹ Миян Енным енэжас [да му вылас], Сійӧ вӧчӧ ставсӧ, мый кӧсйӧ.

¹² Войтыръяслӧн идолъясыс – эзысьысь да зарниысь киӧн вӧчӧмторъяс.

¹³ Налӧн эм вом, но найӧ оз сёрнитны, налӧн эм син, но найӧ оз аддзыны,

¹⁴ налӧн эм пель, но найӧ оз кывны, налӧн эм ныр, но найӧ оз исавны,

¹⁵ налӧн эм ки, но найӧ оз видлавны, налӧн эм кок, но найӧ оз ветлӧдлыны, налӧн горшысь оз пет гӧлӧс шы.

¹⁶ На кодьӧсь жӧ лоӧны найӧс вӧчысьяс, тшӧтш на вылӧ лача кутысьяс.

¹⁷ Израиль войтыр, лача кут Господь вылӧ! Сійӧ – миянлы отсӧг сетысьыс да сайӧдыс.

¹⁸ Ааронлӧн котырыс, лача кут Господь вылӧ! Сійӧ – тіянлы отсӧг сетысьыс да сайӧдыс.

¹⁹ Господьысь полысьяс, лача кутӧй Господь вылӧ! Сійӧ – миянлы отсӧг сетысьыс да сайӧдыс.

²⁰ Господь оз вунӧдлы миянӧс, Сійӧ бурсиӧ миянӧс, бурсиӧ Израиль войтырӧс, бурсиӧ Ааронлысь котырсӧ.

²¹ Господь бурсиӧ Сыысь полысьясӧс: ичӧтӧс и гырысьӧс.

²² Господь мед уна пӧвстӧн содтас тіянӧс, тіянлысь да тіян ныв-пилысь лыдсӧ.

²³ Мед бурсиас тіянӧс Господь, коді вӧчис енэжсӧ да мусӧ.

²⁴ Енэжыс – Господьлӧн, а мусӧ Сійӧ йӧзлы сетіс.

²⁵ Оз кулӧмаяс ошкыны Господьӧс, оз найӧ, кодъясӧс гуалӧны,

²⁶ а ми ошкам Господьӧс, ошкам Сійӧс ӧні и нэмъяс чӧж. Аллилуйя!