Псалтыр 111 - Коми Библия 2023

111 Псалом

¹ Аллилуйя! Шуда сійӧ мортыс, коді полӧ Господьысь да ёна радейтӧ Сылысь тшӧктӧмъяссӧ.

² Сысянь чужысьяс лоӧны вынаӧсь асланыс муас, веськыда олысьяслысь рӧдсӧ лоӧ бурсиӧма.

³ Сылӧн керкаын тырмымӧн лоӧ озырлуныс, сылӧн веськыдлуныс лоӧ нэмъяс чӧж.

⁴ Весиг пемыдас ӧзйӧ югыдыс веськыда олысьлы, сійӧ бур да мелі сьӧлӧма, веськыда вӧчӧ.

⁵ Бур морт буралӧ мӧдыс дінӧ да водзӧсӧн сетӧ, ставсӧ вӧчӧ веськыдлун серти.

⁶ Веськыда олысь некор оз вӧрзьыв, сійӧс оз вунӧдны.

⁷ Сійӧ оз повзьы лёк юӧрысь, сійӧ зумыд лача кутӧ Господь вылӧ.

⁸ Сійӧ повтӧм сьӧлӧма да збой, вермысьӧн видзӧдӧ дзескӧдысьяс вылӧ.

⁹ Сійӧ лышкыда разӧдӧ, сеталӧ гӧльяслы, сылӧн веськыда вӧчӧмыс кутас овны нэмъяс чӧж, сійӧ олӧ юрсӧ лэптӧмӧн, ӧд сійӧс пыдди пуктӧны.

¹⁰ Тайӧс аддзигӧн Ентӧг олысь скӧралӧ, пиньсӧ йирӧ и лёкысла потӧ. Лёк вӧчысьяслӧн кӧсйӧмыс торксьӧ. Ошкӧм.