Псалтыр 110 - Коми Библия 2023

110 Псалом

¹ Аллилуйя! Господьӧй, став сьӧлӧмсянь ошка Тэнӧ веськыда олысьяс пӧвстын, Тэнад войтырлӧн чукӧртчӧмын.

² Господьлӧн уджъясыс ыджыдӧсь, Сылысь уджъяссӧ радейтысьяс кӧсйӧны тӧдны найӧс.

³ Сылӧн уджъясыс ошканаӧсь да мичаӧсь, Сылӧн веськыдлуныс олӧ нэмъяс чӧж,

⁴ Сылысь шензьӧданаторъяссӧ огӧ вунӧдӧй. Господь – бур да мелі сьӧлӧма.

⁵ Сыысь полысьясӧс Сійӧ пӧткӧдӧ, некор оз вунӧд Ассьыс йитӧдсӧ.

⁶ Уджъясыс пыр Сійӧ петкӧдліс войтырыслы Ассьыс вынсӧ, вичмӧдіс налы войтыръяслысь муяссӧ.

⁷ Сійӧ ставсӧ вӧчӧ збыль да веськыдлун серти, Сылӧн тшӧктӧмъясыс зумыдӧсь,

⁸ вынаӧсь нэмъяс чӧж, налӧн подулыс – збыльыс да веськыдлуныс.

⁹ Сійӧ мездіс Ассьыс войтырсӧ, кӧрталіс накӧд йитӧд нэмъяс кежлӧ. Сылӧн нимыс вежа да повзьӧдана.

¹⁰ Мывкыдлуныс чужӧ Господьысь полӧмсянь, Сылӧн тшӧктӧм серти олысьяс бур мывкыдаӧсь. Сылы ошкӧмыс мед лоӧ нэмъяс чӧж!