Псалтыр 11 - Коми Библия 2023

11 Псалом

¹ Сьылысьясӧн веськӧдлысьлы. Ворсӧны кӧкъямыс струнаа ворсанторйӧн. Давидлӧн псалом.

² Господьӧй, отсав меным, ӧд мувывса йӧз пӧвстын эз коль мортыс, кодлы позьӧ эскыны.

³ Ставныс пӧрйӧдлӧны ӧта-мӧднысӧ, кывнас мавтыштӧны да наяна сёрнитӧны.

⁴ Но Господь бырӧдас ылӧдчысьясӧс, найӧс, кодъяс ошйысьӧны,

⁵ миян кывным пӧ вына, вомнымӧс некод оз вермы тупкыны, некод оз вен миянӧс.

⁶ Но Господь висьталӧ: «Ме сувта, медым мездыны коньӧръясӧс дзескӧдӧмысь, медым отсавны гӧльяслы налӧн шог дырйи. Доръя сійӧс, кодӧс кӧсйӧны кыйны».

⁷ Господьлӧн кывъясыс сӧстӧмӧсь, найӧ няйтысь весалӧм эзысь кодьӧсь, сизим пӧв биын сывдӧм эзысь кодьӧсь.

⁸ Господьӧй, видз миянӧс, быд кадӧ дорйы тайӧ нэмас олысь йӧзысь!

⁹ Ӧд быдлаын ветлӧны лёк вӧчысьяс, йӧзыс ошйысьӧны асланыс лёк уджъясӧн.