Псалтыр 109 - Коми Библия 2023

109 Псалом

1 Давидлӧн псалом.

¹ Давидлӧн псалом. Господь шуис менам Ыджыдлы: «Пукав Менам веськыдладорын, кытчӧдз ог пукты Тэнад кок улӧ Тэнӧ мустӧмтысьясӧс».

² Господь мӧдӧдас Тэныд юралан бедьсӧ Сионсянь, медым Тэ ыджыдалін вӧрӧгыд вылын.

³ Тышӧ петан лунӧ Тэнад вежа войтырыд сувтас вынаӧн. Тэ чужин, кыдзи лысваыс усьӧ кыа петтӧдз на.

⁴ Господь кыв сетіс да оз веж сійӧс. Сійӧ шуис: «Мелкиседек моз Тэ пыр кежлӧ Аркирей».

⁵ Господь сулалӧ Тэнад веськыдладорын. Аслас скӧралан лунӧ Сійӧ пасьвартас ӧксыясӧс,

⁶ мыждас войтыръясӧс, тыртас мусӧ шойясӧн, разӧдас налысь юръяссӧ став му пасьтала.

⁷ Аслас туйӧд мунігӧн ӧксы пондас юны шорысь ва, вермысьӧн кыпӧдас юрсӧ.