Псалтыр 108 - Коми Библия 2023

108 Псалом

1 Сьылысьясӧн веськӧдлысьлы. Давидлӧн псалом.

¹ Сьылысьясӧн веськӧдлысьлы. Давидлӧн псалом. Енмӧй, ме ошка Тэнӧ, кора Тэнӧ, эн чӧв ов!

² Ӧд ылӧдчысьяс меным паныд вомнысӧ паськӧдісны, лёк вӧчысьяс меным ылӧгсӧ висьталӧны.

³ Быд боксянь резӧны менӧ мустӧм кывъясӧн, помкатӧг усьласьӧны ме вылӧ.

⁴ Найӧ мыжалӧны менӧ, а ме радейта найӧс да кевмыся.

⁵ Бур вӧчӧмысь найӧ мынтысьӧны меным лёкӧн, менам муслунысь – мустӧмтӧмӧн.

⁶ Енмӧй, менӧ мустӧмтысь вылӧ сувтӧд лёк мортӧс, сӧтана мед лоӧ сылӧн веськыдладорын.

⁷ Сійӧс мед мыждасны ёрд водзын, сылысь кевмысьӧмсӧ мед лыддясны мыж вӧчӧмӧн.

⁸ Сылӧн олан лунъясыс мед дженьдасны, сылысь кесъялӧмсӧ мед босьтас мӧд.

⁹ Сылӧн челядьыс мед колясны батьтӧг, сылӧн гӧтырыс мед лоӧ дӧваӧн.

¹⁰ Сылӧн челядьыс мед лоасны корысь-шӧйтысьясӧн, найӧ мед оласны киссьӧм керкаын да корасны няньтор.

¹¹ Водзӧсалысь мед бӧр босьтас сылысь ставсӧ, йӧз муысь локтысь мед мырддяс сылысь эмбурсӧ.

¹² Мед некод оз ло бур сьӧлӧма сы дінӧ, сылысь батьтӧм челядьсӧ мед некод оз жалит.

¹³ Сысянь чужысьясӧс мед лоӧ бырӧдӧма, сылӧн пияныс мед кольӧны питӧг.

¹⁴ Господь мед оз вунӧд сылӧн батьяслысь лёк вӧчӧмсӧ, мед оз вунӧд сылӧн мамыслысь мыжсӧ,

¹⁵ налӧн мыжъясыс мед пыр лоасны Господьлӧн син водзын, но асьнысӧ найӧс мед пыр кежлӧ лоӧ вунӧдӧма.

¹⁶ Менӧ мустӧмтысь эз вӧв бур сьӧлӧма, а дзескӧдіс гӧльӧс да коньӧрӧс, ловнас усьӧмаӧс водзӧ уськӧдіс.

¹⁷ Сійӧ радейтіс ёрны, та вӧсна ёрӧмыс бӧр воас сы вылӧ. Сійӧ эз кӧсйы бурсины, та вӧсна бурсиӧмыс ылыстчас сы дінысь.

¹⁸ Ёрӧм мед вевттяс сійӧс паськӧм моз, ва моз мед визувтас сы пытшкӧ, вый моз мед йиджас сылӧн лыясӧдз.

¹⁹ Ёрӧмыс сылы мед лоас паськӧмӧн, сылӧн коскас – вӧньӧн.

²⁰ Тадзи Господь мед мынтысяс менӧ мустӧмтысьлы, ме йылысь лёксӧ висьталысьлы.

²¹ Но Тэ, Господьӧй Ыджыдӧй, Аслад нимыд вӧсна дорйы менӧ, мезды менӧ, ӧд Тэнад буралӧмыд вывті ыджыд.

²² Ме гӧль да коньӧр, менам сьӧлӧмӧй доймалӧма.

²³ Ме вуджӧр моз быра, саранчаӧс моз менӧ пыркнитӧны.

²⁴ Видзалӧмысь менам пидзӧсӧй жебмис, ме дзикӧдз омӧльтчи.

²⁵ Мустӧмтысьяс лэптӧны менӧ серамвыв, менӧ аддзигӧн довкйӧдлӧны юрнаныс.

²⁶ Господьӧй Енмӧй, отсав меным, Аслад буралӧмыд кузя мезды менӧ.

²⁷ Мед найӧ аддзасны, мый Тэнад киыд мездіс менӧ, мый Тэ, Господьӧй, вӧчин тайӧс.

²⁸ Найӧ ёрӧны, но Тэ бурси менӧ. Найӧ кыпӧдчӧны меным паныд, но найӧс лоӧ янӧдӧма. А ме, Тэнад кесйӧгыд, кута нимкодясьны.

²⁹ Лёкӧдӧмыс мед лоас налы паськӧмӧн, янӧдӧмнас – вевттьӧдӧн.

³⁰ Аслам вомӧн ме аттьӧала Господьӧс, ошка Сійӧс уна йӧз водзын.

³¹ Ӧд Сійӧ сулалӧ коньӧрлӧн веськыдладорын, мездӧ сійӧс мыждысьясысь. Ошкӧм.