Псалтыр 106 - Коми Библия 2023

106 Псалом

[Аллилуйя!]

¹ Ошкӧй Господьӧс, ӧд Сійӧ бур, Сылӧн буралӧмыс оз помасьлы!

² Тадзи мед шуасны мездмӧмаяс, кодъясӧс Господь мездіс дзескӧдысьлӧн кипод улысь,

³ чукӧртіс быд му пельӧсысь: асыввылысь и рытыввылысь, войвылысь и саридз дорысь.

⁴ Найӧ шӧйтісны-ветлісны овтӧминӧд, корсисны кушинысь кар, медым овмӧдчыны, но эз аддзыны.

⁵ Найӧ пыкисны тшыглун да горш косьмӧм, найӧ дзикӧдз нюкыртчисны.

⁶ Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь.

⁷ Сійӧ нуӧдіс найӧс веськыд туйӧд, вайӧдіс карӧ, кытчӧ найӧ вермисны овмӧдчыны.

⁸ Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!

⁹ Ӧд Сійӧ ловзьӧдӧ нюкыртчӧмаясӧс, Аслас бурнас пӧткӧдӧ тшыгъялысьясӧс.

¹⁰ Найӧ олісны пемыдас, сап пемыдас, вӧлі тырӧмаӧсь шогӧн, найӧс вӧлі дорӧма кӧртӧн,

¹¹ ӧд пыксисны Енлӧн кывъяслы, нинӧмӧ пуктісны Медвылыссалысь туйдӧдӧмсӧ.

¹² Господь раммӧдліс налысь сьӧлӧмсӧ сьӧкыд уджӧн. Найӧ усисны кок йывсьыныс, и отсалысьыс эз вӧв.

¹³ Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь.

¹⁴ Сійӧ петкӧдіс найӧс пемыдсьыс, сап пемыдсьыс, жугліс налысь чепъяссӧ.

¹⁵ Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!

¹⁶ Сійӧ кисьтіс ыргӧн дзиръяяс, жугліс кӧрт иганъяс.

¹⁷ Мывкыдтӧмъяс сьӧкыдалісны кывзысьтӧм оласног да мыж вӧснаныс.

¹⁸ Найӧ зывӧктісны сёяннысӧ, воисны куланвыйӧдз.

¹⁹ Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь.

²⁰ Сійӧ мӧдӧдіс Ассьыс кывсӧ да бурдӧдіс найӧс, видзис найӧс гуӧ веськалӧмысь.

²¹ Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!

²² Вайӧй Сылы аттьӧалана вись, нимкодясьӧмӧн юӧртӧй Сылӧн уджъясыс йылысь!

²³ Кодсюрӧ кывтісны корабльяс вылын саридзӧд, сэні перйисны аслыныс кынӧмпӧт.

²⁴ Найӧ аддзисны Господьлысь уджъяссӧ, пыдӧстӧм ваысь Сылысь шензьӧданаторъяссӧ.

²⁵ Господь тшӧктіс, и кыптіс ыджыд тӧвныр, саридзын быгзисны гыясыс.

²⁶ Корабльын кывтысьяс кыптылісны енэжӧдзыс, усьлісны саридз пыдӧсӧдзыс, полӧмнысла налӧн сьӧлӧмныс лэччывліс коклябӧрӧдзыс.

²⁷ Найӧс шатлӧдліс код мортӧс моз, найӧ ӧдва сулалісны кок йыланыс, налӧн став кужӧмлуныс бырис-вошис.

²⁸ Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь.

²⁹ Сійӧ лӧньӧдіс тӧвнырсӧ, и гыясыс ланьтісны.

³⁰ Кывтысьяс нимкодясисны, мый саридзыс лӧнис. Господь вайӧдіс найӧс сэтчӧ, кытчӧ налы колӧ вӧлі кывтнысӧ.

³¹ Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!

³² Ен войтырлӧн чукӧртчӧмын ыдждӧдлӧй Сійӧс, юрнуӧдысьяс пӧвстын ошкӧй Сійӧс!

³³ Юясысь Сійӧ вӧчӧ овтӧмин, ва петанінъясысь – косін,

³⁴ бур муысь – сола му сэтчӧс олысьяслӧн лёк оласногныс вӧсна.

³⁵ Кушинысь Сійӧ артмӧдӧ ты, кос муысь – ва петанінъяс,

³⁶ овмӧдӧ сэтчӧ тшыгъялысьясӧс. Найӧ лэптӧны сэні аслыныс кар,

³⁷ кӧдзӧны муяс, пуктӧны виноград пуяс, и пуясыс вайӧны уна вотӧс.

³⁸ Господь бурсиӧ найӧс, и налӧн лыдыс содӧ, налӧн ыж-мӧскыс оз чин.

³⁹ Но дзескӧдысь вӧсна налӧн лыдыс чинӧ, найӧ сьӧкыдалӧны да шогсьӧны.

⁴⁰ Сэки Господь чорыда янӧдӧ налысь юрнуӧдысьяссӧ, эновтӧ найӧс шӧйтны-ветлыны овтӧминӧд.

⁴¹ А гӧльясӧс Сійӧ мездӧ шогысь, насянь чужысьясӧс рӧдмӧдӧ ыж чукӧрӧс моз.

⁴² Тайӧс аддзигӧн веськыда олысьяс нимкодясьӧны, а лёк вӧчысьяс тупкӧны вомнысӧ.

⁴³ Мывкыд морт казялӧ тайӧс, гӧгӧрвоӧ Господьлысь буралӧмсӧ. Ошкӧм.