Псалтыр 105 - Коми Библия 2023

105 Псалом

¹ Аллилуйя! Ошкӧй Господьӧс, ӧд Сійӧ бур, Сылӧн буралӧмыс оз помасьлы.

² Коді вермас тырвыйӧ ошкыны Господьӧс, висьтавны Сылӧн став вына уджъясыс йылысь?

³ Шудаӧсь найӧ, кодъяс олӧны веськыдлун серти, веськыда вӧчӧны быд кадӧ.

⁴ Господьӧй, Аслад войтырыд дінӧ буралігӧн эн вунӧд ме йылысь, лок ме дінӧ, мезды менӧ,

⁵ медым ме босьті бур олӧмсӧ Тэнад бӧрйӧмаяскӧд, верми нимкодясьны Тэнад войтырыдкӧд, Тэнад бӧрйӧмаяскӧд ошкыны Тэнӧ.

⁶ Асланым батьяс моз ми мыж вӧчим, кежим веськыдлунсьыс да вӧчим лёксӧ.

⁷ Египетын оліганыс миян батьяс эз гӧгӧрвоны Тэнсьыд шензьӧданаторъястӧ, найӧ вунӧдісны Тэнсьыд ыджыд буралӧмтӧ, Гӧрд саридз дорын кыпӧдчисны Тэныд паныд.

⁸ Но Аслас нимыс вӧсна Господь мездіс найӧс, петкӧдліс Ассьыс ыджыд вынсӧ.

⁹ Господь тшӧктіс Гӧрд саридзлы, и сійӧ косьмис. Сэки Господь нуӧдіс найӧс саридз пыдӧсӧд косінті моз.

¹⁰ Сійӧ мездіс найӧс мустӧмтысьяслӧн киысь, дорйис вӧтчысьясысь.

¹¹ Ваыс вевттис дзескӧдысьясӧс, весиг ӧти на пиысь ловйӧн эз коль.

¹² Сэки миян батьяс эскисны Господьлӧн кывъясӧ, сьылӧмӧн ошкисны Сійӧс.

¹³ Но найӧ ӧдйӧ вунӧдісны Сылысь уджъяссӧ, эз виччысьны Сылысь туйдӧдӧмсӧ.

¹⁴ Овтӧминын найӧ пӧтлытӧг горшасисны, дӧзмӧдісны сэні Енсӧ.

¹⁵ Енмыс сетіс налы корӧм сертиныс, но мӧдӧдіс сьӧкыд висьӧм.

¹⁶ Асланыс чомъясын найӧ пондісны вежавны Мӧисейлы да Ааронлы, Господьлӧн вежа мортлы.

¹⁷ Сэки муыс воссис да ньылыштіс Датанӧс, тшӧтш Авирамӧс да сыкӧд ӧтувтчысьясӧс.

¹⁸ Йӧз чукӧрас ыпнитіс би да сотіс лёк вӧчысьясӧс.

¹⁹ Хорив керӧс дорын миян батьяс вӧчисны ӧшкӧс, копыртчисны бӧлбанлы.

²⁰ Ассьыныс дзирдлуна Енсӧ найӧ вежисны бӧлбан вылӧ, турун сёйысь ӧш вылӧ.

²¹ Найӧ вунӧдісны Енсӧ, ассьыныс Мездысьӧс, коді Египетын вӧчис ыджыд уджъяс,

²² Хамлӧн муын – шензьӧданаторъяс, Гӧрд саридз дорын – повзьӧданаторъяс.

²³ Енмыс шуис бырӧдны найӧс, но Мӧисей, Сылӧн бӧрйӧмаыс, сувтіс Сы водзӧ, медым Сійӧ Аслас скӧрлунӧн эз бырӧд найӧс.

²⁴ Найӧ нинӧмӧ пуктісны бур мусӧ, эз эскыны Господьлӧн кывйӧ,

²⁵ ропкисны асланыс чомъясын, эз кывзыны Господьӧс.

²⁶ Сэки Господь лэптіс Ассьыс кисӧ, медым бырӧдны найӧс овтӧминын,

²⁷ разӧдны насянь чужысьясӧс войтыръяс пӧвстӧ, шердйыны найӧс став му пасьталаыс.

²⁸ Сьӧлӧмнаныс найӧ сирасисны Ваал-Пеор ен дінӧ, сёйисны идолъяслы вайӧм висьяс.

²⁹ Асланыс уджъясӧн найӧ дӧзмӧдісны Господьӧс, та вӧсна найӧс суис бырӧдӧм.

³⁰ Сэки чеччис Пинес, мыждіс мыжаясӧс, и бырӧдӧмыс лӧнис.

³¹ Та понда сійӧс лыддьӧны веськыда олысьӧн чужысьяссянь чужысьясӧдз нэмъяс чӧж.

³² Мерива ва дорын найӧ бара дӧзмӧдісны Господьӧс, и Мӧисейлы ковмис сьӧкыдавны на вӧсна.

³³ Найӧ скӧрмӧдісны Мӧисейӧс, и сійӧ мыжмис аслас кывъясыс вӧсна.

³⁴ Найӧ эз бырӧдны сійӧ войтыръяссӧ, кодъяс йылысь Господь висьтавліс налы,

³⁵ но ӧтувтчисны накӧд, вӧчисны на моз жӧ,

³⁶ юрбитісны налӧн идолъяслы да шедісны налӧн налькйӧ.

³⁷ Ныв-пинысӧ найӧ вайлісны вись пыдди пеж ловъяслы,

³⁸ кисьтісны мыжтӧм ныв-пиныслысь вирсӧ, вайлісны найӧс вись пыдди ханаансаяслӧн идолъяслы, вир кисьтӧмнас пежалісны мусӧ.

³⁹ Уджъяснас найӧ пежалісны асьнысӧ, кырсалысь ань моз сетчисны идолъяслы.

⁴⁰ Господьлӧн скӧрлуныс ыпнитіс Аслас войтыр вылӧ, Сійӧ зывӧктіс Ассьыс бӧрйӧмаяссӧ.

⁴¹ Сійӧ сетіс найӧс войтыръяслӧн киӧ, мустӧмтысьяс ыджыдалісны на вылын.

⁴² Найӧ шедісны вӧрӧглӧн кипод улӧ, мустӧмтысьяс дзескӧдісны найӧс.

⁴³ Господь унаысь мездыліс найӧс, но найӧ кыпӧдчисны Сылы паныд, асныралӧмнас вӧйисны мыжас.

⁴⁴ Но Господь аддзис налысь шогсӧ, кывзіс налысь бӧрдӧмӧн шыасьӧмсӧ.

⁴⁵ Сійӧ эз вунӧд накӧд кӧрталӧм йитӧдсӧ, ыджыд буралӧмыс кузя Сійӧ бурсьӧлӧмтчис на дінӧ,

⁴⁶ найӧс пленӧ нуӧдысьяслысь сьӧлӧмсӧ небзьӧдліс.

⁴⁷ Господьӧй, миян Енмӧй, мезды миянӧс, чукӧрт миянӧс войтыръяс пӧвстысь. Сэки ми ошкам Тэнсьыд вежа нимтӧ, кутам ошйысьны Тэнад дзирдлунӧн.

⁴⁸ Ошкӧм Господьлы, Израильлӧн Енлы, нэмъяс чӧж! Став войтырыс мед шуас: «Аминь! Аллилуйя!» Ошкӧм.