Псалтыр 104 - Коми Библия 2023

104 Псалом

¹ Ошкӧй Господьӧс, шыасьӧй Сы дінӧ, войтыръяс пӧвстын висьтавлӧй Сылӧн уджъясыс йылысь!

² Сьылӧй Сылы, ошкӧй Сійӧс, висьтавлӧй Сылӧн шензьӧдана уджъясыс йылысь!

³ Ошйысьӧй Сылӧн вежа нимнас! Господьӧс корсьысьлӧн мед нимкодясяс сьӧлӧмыс!

⁴ Корсьӧй Господьӧс да Сылысь вынсӧ, дугдывтӧг корсьӧй Сылысь чужӧмбансӧ.

^5-6 Ті, Ӧвраамсянь чужысьяс, Господьлӧн кесйӧгъяс, Яковлӧн пиян, Господьлӧн бӧрйӧмаяс, энӧ вунӧдӧй Сылысь шензьӧданаторъяссӧ, индысьпасъяссӧ да веськыда мыждӧмсӧ.

⁷ Сійӧ – Господь, миян Енным, Сійӧ веськыда мыждӧ став му пасьтала.

⁸ Сійӧ некор оз вунӧд Ассьыс йитӧдсӧ, водзӧ чужысьяслы пыр кежлӧ сетӧм кывсӧ.

⁹ Сійӧ оз вунӧд Ӧвраамкӧд кӧрталӧм йитӧдсӧ, Исааклы сетӧм кывсӧ.

¹⁰ Яковлы Сійӧ вынсьӧдіс Ассьыс кывсӧ, Израилькӧд йитӧдсӧ кӧрталіс пыр кежлӧ.

¹¹ Сійӧ шуис: «Ме сета тэныд Ханаан му, вичмӧда сійӧс тэныд».

¹² Сэки Израиль войтырлӧн лыдыс вӧлі этша на, Ханаан муын найӧ вӧліны локтысь йӧзӧн.

¹³ Ӧти войтырсянь найӧ вуджлісны мӧд войтыр дінӧ, ӧти муысь – мӧд муӧ.

¹⁴ Господь некодлы эз лэдз дзескӧдны найӧс, Сійӧ ӧлӧдліс ӧксыясӧс:

¹⁵ «Энӧ вӧрӧдӧй Менсьым мавтыштӧмаясӧс, Менам пророкъяслы энӧ вӧчӧй лёксӧ».

¹⁶ Господь мӧдӧдіс му вылӧ тшыг кад, бырӧдіс став кӧдзӧм няньсӧ,

¹⁷ та водзвылын мӧдӧдіс Ӧсипӧс Египет муӧ, сійӧс вӧлі вузалӧма сэтчӧ кесйӧг пыдди.

¹⁸ Сылысь коксӧ вӧлі дорӧма чептӧн, сылӧн сьыліас ӧшаліс кӧрт кольча,

¹⁹ кытчӧдз эз ин Господьлӧн кывйыс, кытчӧдз Господь Аслас кывйӧн эз тӧдмав Ӧсипӧс.

²⁰ Египетса ӧксы мездіс сійӧс дорӧмысь, войтыръяслӧн юралысь лэдзис сійӧс дзескыдінысь.

²¹ Ӧксы пуктіс сійӧс ыджыдавны аслас керка вылын, кывкутны аслас овмӧс вӧсна,

²² индіс туйдӧдны юралысьясӧс, велӧдны мывкыдлунӧ юрнуӧдысьясӧс.

²³ Тадзи Израиль локтіс Египетӧ, Яков овмӧдчис Хамлӧн муӧ.

²⁴ Сэні Господь рӧдмӧдіс Ассьыс войтырсӧ, вӧчис вӧрӧг дорысь вынаджыкӧн.

²⁵ Египетсаясӧс Сійӧ ышӧдіс мустӧмтны Ассьыс войтырсӧ, нартитны Ассьыс кесйӧгъяссӧ.

²⁶ Сэки Господь мӧдӧдіс Мӧисейӧс, Ассьыс кесйӧгсӧ, да Ааронӧс, Ассьыс бӧрйӧмасӧ.

²⁷ Найӧ петкӧдлісны индысьпасъяс египетсаяс пӧвстын, шензьӧданаторъяс Хамлӧн муын.

²⁸ Господь мӧдӧдіс пемыдсӧ, пуксис сап пемыд, и египетсаяс эз вермыны паныд кыпӧдчыны Сылы.

²⁹ Налысь васӧ Господь пӧртіс вирӧ, бырӧдіс налысь став черисӧ.

³⁰ Налӧн муыс тырис жабаясӧн, найӧ локтісны весиг ӧксылӧн вежӧсъясӧ.

³¹ Господь шуис, и лӧдз-гут вевттис енэжсӧ, гебъяс кутісны лэбавны став му пасьталаыс.

³² Зэр пыдди Сійӧ мӧдӧдіс налы шер, ыпъялысь би мӧдӧдіс налӧн му вылӧ.

³³ Сійӧ жугліс налысь виноград да инжир пуяссӧ, чегъяліс налӧн му вылысь мукӧд пуяссӧ.

³⁴ Сійӧ шуис, и саранча уськӧдчис лыдтӧм-тшӧттӧм чукӧрӧн,

³⁵ сёйис видз вылысь став турунсӧ, куштіс видз-му вылысь став быдмӧг-вотӧссӧ.

³⁶ Господь бырӧдіс Египетысь став медводдза чужысьсӧ, виис египетсаяслысь медводдза пиянсӧ.

³⁷ Сійӧ петкӧдіс Египетысь Израиль войтырӧс, найӧ петісны эзысь-зарниӧн, налӧн чужанкотыръясын эз вӧв вынтӧмыс.

³⁸ Египетсаяс нимкодясисны налӧн петӧмысь, ӧд ёна полісны наысь.

³⁹ Израиль войтырӧс Господь вевттис кымӧрӧн, мӧдӧдіс налы би, медым войнас югзьӧдны налы.

⁴⁰ Найӧ корисны сёян, и Господь мӧдӧдіс налы квайтпалич пӧткаясӧс, вердіс найӧс енэжвывса няньӧн.

⁴¹ Сійӧ поткӧдіс изкырта, и ваыс ыльӧбтіс сэтысь, шорӧн визувтіс косінті.

⁴² Сійӧ эз вунӧд Ассьыс вежа кывсӧ, Ӧвраам кесйӧгыслы кӧсйысьӧмсӧ.

⁴³ Сійӧ петкӧдіс Ассьыс войтырсӧ, и найӧ нимкодясисны, петкӧдіс бӧрйӧмаясӧс, и найӧ гажӧдчисны.

⁴⁴ Сійӧ сетіс налы войтыръяслысь муяссӧ, вичмӧдіс видз-муяссӧ,

⁴⁵ медым найӧ видзисны Сылысь тшӧктӧмъяссӧ, олісны Сылӧн Индӧд серти. Аллилуйя! Ошкӧм.