Псалтыр 103 - Коми Библия 2023

103 Псалом

[Му вӧчӧм йылысь Давидлӧн псалом.]

¹ Ошкы Господьӧс, менам лолӧй! Господьӧй, менам Енмӧй, Тэ шензьӧдана ыджыд! Тэ вевттьысьӧмыд дзирдлунӧн да ыджыдалан вынӧн.

² Тэ пасьтасьӧмыд югыднас, вонйӧс моз Тэ шевкнитӧмыд енэжъяс,

³ ваяс весьтын лӧсьӧдӧмыд Аслыд вылысса жыръяс. Кымӧръяссӧ Тэ вӧчан Аслад тарантасӧн, Тэ шевкъялан тӧв бордъяс вылын.

⁴ Тӧвнырысь Тэ вӧчан Аслыд юӧр вайысьясӧс, ыпъялан биысь – Аслыд кесъялысьясӧс.

⁵ Тэ сувтӧдін мусӧ зумыд подув вылӧ, сійӧ некор оз вӧрзьыв.

⁶ Эшкынӧн моз Тэ вевттин сійӧс пыдӧстӧм ваӧн, весиг керӧсъясӧс вевттис ва.

⁷ Но Тэнад ӧлӧдӧмысь ваяс пышйисны, Тэнад гым шыысь найӧ ӧдйӧ ылыстчисны.

⁸ Керӧс вывсянь найӧ визувтӧны ласта вылӧ, сэтчӧ, кытчӧ Тэ тшӧктін.

⁹ Тэ потшӧсалін ваяс, медым найӧ бара эз вевттьыны мусӧ.

¹⁰ Ва визувтанінъяс Тэ восьтін ковтысъясын, ваыс визувтӧ керӧсъяс костӧд.

¹¹ Сэтысь юӧны вӧрса пемӧсъяс, сэтысь веськӧдӧны горшнысӧ вӧлявывса осёлъяс.

¹² Ва дорӧ поздысьӧны лэбачьяс, дзользьӧны-сьылӧны пу вожъяс вылын.

¹³ Аслад выліинсянь Тэ зэрӧн юктӧдан керӧсъяс, Тэнад сетӧмторъясӧн пӧткӧдчӧ муыс.

¹⁴ Ыж-мӧслы Тэ быдтан турун, мортлы – быдмӧг, тадзи муыс сетӧ налы сёян.

¹⁵ Тэ сетан вина, медым гажӧдны мортлысь сьӧлӧмсӧ, нянь, медым ёнмӧдны мортӧс, вый, медым югъяліс мортлӧн чужӧмыс.

¹⁶ Тэ пӧткӧдан ливанса сус пуяс, Господьлӧн пуяс пыр вежӧсь.

¹⁷ Налӧн вожъяс вылӧ поздысьӧны лэбачьяс, сэтчӧ поздысьӧны аистъяс.

¹⁸ Джуджыд керӧс вылӧ овмӧдчӧны кӧзаяс, изкыртаӧ овмӧдчӧны даманъяс.

¹⁹ Тэ вӧчин тӧлысь, медым петкӧдлыны кадсӧ. Шонді тӧдӧ ассьыс лэччан кадсӧ.

²⁰ Тэ мӧдӧдан пемыдсӧ, пуксьӧ вой, и зверъяс петӧны кынӧмпӧт корсьны.

²¹ Левъяс равзӧны, корсьӧны аслыныс кыйдӧс, корӧны Енмыслысь сёян.

²² Шонді петігӧн найӧ дзебсьӧны, бӧр бергӧдчӧны асланыс шойччанінӧ.

²³ Сэки морт петӧ уджавны, рытӧдзыс вӧчӧ ассьыс уджсӧ.

²⁴ Господьӧй, Тэнад уджъясыд лыдтӧм-тшӧттӧмӧсь, Тэ ставсӧ вӧчӧмыд бур мывкыдӧн! Муыс тыр Тэнад вӧчӧмторъясӧн.

²⁵ Со помтӧм-дортӧм саридз! Сэні олысьсӧ он вермы лыддьыны, сэні олӧны гырысь и посни уялысьяс.

²⁶ Сэті кывтӧны корабльяс, сэні ворсӧдчӧ левиафан – Тэнад вӧчӧмторйыд.

²⁷ Тэнад вӧчӧмторъясыд виччысьӧны, медым Тэ ас кадӧ сетін налы сёян.

²⁸ Тэ сетан налы, и найӧ босьтӧны, Аслад киӧн Тэ вердан найӧс, и найӧ пӧттӧдзныс сёйӧны.

²⁹ Тэ тупкан наысь Ассьыд чужӧмбантӧ, и найӧ шызьӧны, босьтан налысь ловсӧ, и найӧ кулӧны, бӧр бергӧдчӧны муӧ.

³⁰ Тэ мӧдӧдан Ассьыд ловтӧ, и найӧ ловзьӧны, Тэ выльмӧдан муыслысь чужӧмбансӧ.

³¹ Господьӧс мед нимӧдасны нэмъяс чӧж! Мед нимкодясяс Господь Аслас уджъяснас!

³² Сылӧн видзӧдлӧмысь муыс дзӧрӧ, Сылӧн инмӧдчылӧмысь керӧсъяс тшыналӧны.

³³ Кута сьывны Господьлы став олӧм чӧж, кута ошкыны ассьым Енмӧс, кытчӧдз ловъя.

³⁴ Менам сьылӧмӧй мед лоӧ шогмана Господьлы, ме кута нимкодясьны Господь пытшкын.

³⁵ Мед бырасны му вывсьыс мыж вӧчысьяс, лёк вӧчысьяс мед водзӧ оз нин лоны! Ошкы Господьӧс, менам лолӧй! Аллилуйя! Ошкӧм.