Псалтыр 102 - Коми Библия 2023

102 Псалом

1 Давидлӧн псалом.

¹ Давидлӧн псалом. Ошкы Господьӧс, менам лолӧй! Став пытшкӧсӧй, ошкы Сылысь вежа нимсӧ!

² Ошкы Господьӧс, менам лолӧй, эн вунӧд Сылысь став бур вӧчӧмсӧ!

³ Сійӧ прӧститӧ тэнсьыд став мыжтӧ, бурдӧдӧ тэнӧ став висьӧмысь.

⁴ Мездӧ тэнӧ кулӧмыслӧн кабыр улысь, кытшалӧ тэнӧ буралӧмнас да мелілуннас.

⁵ Пӧткӧдӧ тэнсьыд олӧмтӧ бурнас, тэнад томлуныд кутш моз выльмӧ.

⁶ Господь веськыда вӧчӧ, Сійӧ дорйӧ дзескӧдӧмаясӧс.

⁷ Сійӧ петкӧдліс Ассьыс туйяссӧ Мӧисейлы, Ассьыс уджъяссӧ – Израиль войтырлы.

⁸ Господь мелі да бур сьӧлӧма, Сійӧ дыр терпитӧ да ёна буралӧ.

⁹ Оз век Сійӧ скӧрав, оз лӧгав нэмъяс чӧж,

¹⁰ оз мынтысь миянлы мыжъясным серти, оз мыжды миянӧс лёк вӧчӧмным серти.

¹¹ Кутшӧм ыджыд коластыс енэжа-муа костас, сэтшӧм ыджыд Господьлӧн буралӧмыс Сыысь полысьяс дінӧ.

¹² Кутшӧм ылын асыввылыс рытыввывсянь, сы ылна ылыстіс Господь миянлысь мыжъяснымӧс.

¹³ Кыдзи батьыс буралӧ ныв-пиыс дінӧ, сідзи Господь буралӧ Сыысь полысьяс дінӧ.

¹⁴ Сійӧ тӧдӧ, мыйысь вӧчӧма миянӧс, Сійӧ оз вунӧд, мый ми – сӧмын бус чиръяс.

¹⁵ Мортлӧн олӧмыс – турун кодь, сійӧ дзоридзалӧ видзвывса дзоридз моз.

¹⁶ Тӧв пӧльыштас, и сійӧ абу, некод оз нин казьтыв сы йылысь.

¹⁷ Но Господьлӧн буралӧмыс помасьлытӧм Сыысь полысьяс дінӧ,

¹⁸ Сійӧ веськыда вӧчӧ ныв-пиныдлӧн ныв-пиыслы, кодъяс видзӧны Сылысь йитӧдсӧ, оз вунӧдны Сылысь тшӧктӧмъяссӧ, а олӧны на серти.

¹⁹ Господь сувтӧдіс Ассьыс юралан пуклӧссӧ енэжас, ставыс Сылӧн кипод улын.

²⁰ Ошкӧй Господьӧс, вына анделъяс, Сылӧн кыв серти вӧчысьяс, Сылысь висьталӧмсӧ кывзысьяс!

²¹ Ошкӧй Господьӧс, Сылӧн тышкакотыръяс, Сылӧн кесъялысьяс – Сылӧн кӧсйӧм серти олысьяс!

²² Ошкӧй Господьӧс, Сылӧн вӧчӧмторъяс! Ошкӧй Сійӧс быдлаын, кӧні Сійӧ юралӧ! Ошкы Господьӧс, менам лолӧй! Ошкӧм.