Псалтыр 101 - Коми Библия 2023

101 Псалом

¹ Шогсьысь мортлӧн кевмысьӧм, кор сійӧ ловнас усьӧма да вайӧ ассьыс шогсӧ Господь водзӧ.

² Господьӧй, кыв менсьым кевмӧмӧс! Менам гораа бӧрдӧмӧй мед воас Тэнад пельӧдз.

³ Эн дзеб меысь Ассьыд чужӧмбантӧ, менам шогсигӧн копырт мелань Ассьыд пельтӧ. Тэ дінӧ ме шыася, тэрмась вочавидзны меным.

⁴ Менам олан лунъясӧй тшын моз бырӧны, дойыс би моз сотӧ менсьым лыясӧс.

⁵ Менам сьӧлӧмӧй дойысла дзикӧдз топаліс, сійӧ турун моз косьмис. Ме вунӧдла весиг сёйнысӧ,

⁶ гораа бӧрдӧмӧйла менам сӧмын лы-кучикӧй коли.

⁷ Ме лои кушинын олысь пеликан кодь, эновтӧм карын пукалысь сюзь кодь.

⁸ Ме ог вермы узьнысӧ, лои керка вевт вылын пукалысь ӧтка лэбач кодь.

⁹ Мустӧмтысьяс быд лун лёкӧдӧны менӧ, менам нимӧй лои налы ёран кывйӧн.

¹⁰ Ме нянь моз сёя пӧимсӧ, синваӧй лои меным юанторйӧн,

¹¹ ӧд Аслад скӧралӧмыд да лӧгалӧмыд вӧсна Тэ лэптін менӧ да шыбитін Ас дінсьыд.

¹² Менам олан лунъясӧй вуджӧр моз бырӧны, ме турун моз косьми.

¹³ Но Тэ, Господьӧй, олан нэмъяс чӧж, чужысьяссянь чужысьясӧдз оз вунӧдлыны Тэнӧ.

¹⁴ Тэ кыпӧдчан, Тэ петкӧдлан буралӧмтӧ Сион дінӧ. Воис кад прӧститны сійӧс, воис сылӧн кадыс.

¹⁵ Тэнад кесйӧгъяслы мусаӧсь Сион карлӧн изъясыс, весиг бусыс налы дона.

¹⁶ Войтыръяс пондасны повны Господьлӧн нимысь, мувывса ӧксыяс – Сылӧн дзирдлунысь,

¹⁷ ӧд Господь выльысь сувтӧдас Сион, петкӧдчас Аслас дзирдлунӧн.

¹⁸ Господь кылас коньӧръяслысь кевмӧмсӧ, оз ӧтдорт налысь кевмысьӧмсӧ.

¹⁹ Та йылысь лоӧ гижӧма водзӧ чужысьяслы, водзӧ олысьяс кутасны ошкыны Господьӧс.

²⁰ Господь видзӧдӧ вылісянь, Аслас вежаинсянь, видзӧдӧ му вылӧ енэжсяньыс.

²¹ Сійӧ кылӧ дзескыдінын пукалысьяслысь ымзӧмсӧ, мездӧ кулӧм вылӧ мыждӧмаясӧс.

^22-23 Кор войтыръяс чукӧртчасны, локтасны кесъявны Господьлы, Сылысь нимсӧ кутасны юӧртны Сионын, Сійӧс кутасны ошкыны Ерусалимын.

²⁴ Кадысь водз Сійӧ лэдзис меным вынтӧммыны, дженьдӧдіс менсьым олан лунъясӧс.

²⁵ Ме шуи: «Енмӧй, эн босьт менсьым олӧмӧс, ӧд ме том на. Тэ олан нэмъяс чӧж.

²⁶ [Господьӧй!] Медводз Тэ вӧчин мусӧ, енэжыс тшӧтш Тэнад вӧчӧмтор.

²⁷ Найӧ бырасны, а Тэ помтӧг олан. Паськӧм моз найӧ важмасны, новлӧм кӧлуйӧс моз Тэ вежан найӧс, и найӧ вежсясны.

²⁸ А Тэ он вежсьы, Тэнад олан вояслы помыс оз ло.

²⁹ Тэнад кесйӧгъяслӧн челядьыс кутасны дыр овны, насянь чужысьяс пыр лоӧны Тэнад син водзын».