Петӧм 9 - Коми Библия 2023

Витӧд бырӧдантор: пӧрӧс висьӧм

¹ Господь шуис Мӧисейлы: «Мун фараон дінӧ да висьтав сылы, мый Господь, еврейяслӧн Ен, тадзи висьталӧ: лэдз Менсьым войтырӧс, медым найӧ юрбитасны Меным.

² Он кӧ лэдз Менсьым войтырӧс да водзӧ кӧ кутан пыксьыны,

³ Господьлӧн киыс бырӧдас видз-му вывсьыд пемӧсъястӧ. Вӧвъястӧ, осёлъястӧ, верблюдъястӧ, мӧсъястӧ да ыжъястӧ суас пӧрӧс висьӧм.

⁴ Господь торйӧдас израильсаяслысь ыж-мӧссӧ египетсаяслӧн ыж-мӧскысь, и израильсаяслӧн весиг ӧти пемӧс оз кув».

⁵ Господь урчитіс кад. Сійӧ шуис, аски пӧ Египет муын вӧча тайӧс.

⁶ Мӧд луннас Господь тадзи и вӧчис. Египетсалӧн став пемӧсыс куліс, а Израиль войтырлӧн эз кувны.

⁷ Фараон тшӧктіс тӧдмавны, збыльысь-ӧ Израиль войтырлӧн весиг ӧти пемӧс эз кув. Тайӧс тӧдмалӧм бӧрын фараон чорзьӧдіс сьӧлӧмсӧ да эз лэдз Израиль войтырӧс.

Квайтӧд бырӧдантор: орзьӧм-мылльӧссьӧм

⁸ Мӧисейлы да Ааронлы Господь шуис: «Босьтӧй пачысь китыр пӧим. Мӧисей мед койыштас пӧимсӧ сынӧдас фараон [да сылы кесъялысь йӧз] син водзын.

⁹ Сэки пӧимыс бусӧн кыптас Египет му пасьтала. Йӧз да ыж-мӧс орзяласны-мылльӧссясны».

¹⁰ Мӧисей да Аарон босьтісны пачысь пӧим да локтісны фараон водзӧ. Мӧисей койыштіс пӧимсӧ сынӧдас, и йӧз да ыж-мӧс орзялісны-мылльӧссисны.

¹¹ Тунъяс эз вермыны паныд сувтны Мӧисейлы, ӧд став египетса моз найӧ тшӧтш вӧліны орзьӧмаӧсь-мылльӧссьӧмаӧсь.

¹² Господь чорзьӧдіс фараонлысь сьӧлӧмсӧ, и сійӧ эз кут кывзыны Мӧисейӧс да Ааронӧс. Та йылысь Господь водзвыв висьтавліс Мӧисейлы.

Сизимӧд бырӧдантор: шер

¹³ Господь шуис Мӧисейлы: «Аски чеччы водз, мун фараон дінӧ да висьтав сылы, мый Господь, еврейяслӧн Ен, тадзи висьталӧ: лэдз Менсьым войтырӧс, медым найӧ юрбитасны Меным.

¹⁴ Ӧні Ме мӧдӧда став бырӧданторсӧ тэ вылӧ, тэныд кесъялысь йӧз да став войтырыд вылӧ, медым тэ гӧгӧрвоин, мый став му пасьтала Ме кодь мӧдыс абу.

¹⁵ Ме эськӧ верми лэптыны киӧс тэ вылӧ да мӧдӧдны пӧрӧс висьӧм войтырыд вылӧ – бырӧдны тіянӧс му вывсьыс,

¹⁶ но Ме тэнӧ ловйӧн коля. Тадзи Ме петкӧдла тэныд Ассьым вынӧс, медым Менсьым нимӧс тӧдісны став му пасьталаыс.

¹⁷ Тэ век на паныд кыпӧдчан Менам войтырлы, он лэдз сійӧс.

¹⁸ Аски тайӧ кадас Египет вылӧ Ме кисьта зэв чорыд шер. Татшӧм шерыс ӧнӧдз на эз вӧвлы Египет муын.

¹⁹ Тшӧкты пыртны лэбулӧ ыж-мӧстӧ да ставсӧ видз-му вывсьыд. Видз-му вылӧ кольччӧм йӧзыс да ыж-мӧскыс веськаласны шер улӧ да куласны».

²⁰ Фараонлӧн йӧзыс, кодъяс повзисны Господьлӧн кывйысь, пырысьтӧм-пыр йӧрталісны ыж-мӧснысӧ лэбулӧ, а кесйӧгъясныслы тшӧктісны пырны керкаӧ.

²¹ Но кодлы веськодь вӧлі Господьлӧн кывйыс, сійӧ колис ассьыс кесйӧгъяссӧ да ыж-мӧссӧ видз-му вылӧ.

²² Господь шуис Мӧисейлы: «Лэпты китӧ енэжланьыс, сэки став Египет му вылӧ, йӧз вылӧ, ыж-мӧс вылӧ и быдмӧг-турун вылӧ киссяс шер».

²³ Мӧисей лэптіс бедьсӧ енэжлань, и Господь мӧдӧдіс став Египет му вылӧ чардби, гым да шер.

²⁴ Чардаліс, му вылӧ киссис шер. Татшӧм чорыд шерыс египетса войтырлӧн эз на вӧвлы.

²⁵ Египет муын шерыс жугліс-бырӧдіс ставсӧ, мый вӧлі видз-му вылын: йӧзӧс, ыж-мӧскӧс, быдмӧг-турунсӧ да пуяссӧ.

²⁶ Сӧмын Гошен муын, кӧні олісны Израиль войтыр, эз вӧв шерыс.

²⁷ Фараон корис Мӧисейӧс да Ааронӧс, сэсся шуис налы: «Ӧні ме мыж вӧчи. Господь веськыд, а ме да менам войтырӧй – мыжаӧсь.

²⁸ Кевмысьӧй [ме вӧсна] Господьлы, мед дугӧдас гымсӧ да шерсӧ [да чардбисӧ му вылын]. Сэсся ме лэдза тіянӧс, водзӧ ог нин кут».

²⁹ Мӧисей вочавидзис сылы: «Кор ме пета карсьыс, лэпта киӧс Господьлань [енэжӧ]. Сэки дугдас гымавнысӧ, шерыс [и зэрыс] дугдас, медым тэ тӧдін, мый муыс Господьлӧн.

³⁰ Но ме аддза, мый тэ да тэнад йӧзыд онӧ полӧй Господь Енмысь».

³¹ Шабді да ид лои жугӧдӧма шерӧн, ӧд идйыс вӧлі шептасьӧма нин, а шабдіыс дзоридзаліс на.

³² Но шобді да полба быдмыны на колины, найӧ сёрӧнджык воӧны да.

³³ Мӧисей муніс фараон дінысь, петіс карсьыс да лэптіс кисӧ Господьлань. Гым да шер дугдісны. Зэрыс дугдіс киссьыны му вылӧ.

³⁴ Фараон кор аддзис, мый дугдіс зэрны-гымавны, дугдіс усьны шер, сэки сійӧ бара на важ мозыс мыж вӧчис. Ачыс сійӧ и сылӧн йӧзыс чорзьӧдісны сьӧлӧмнысӧ.

³⁵ Фараон эз лэдз Израиль пиянӧс аслас [да сылы кесъялысь йӧзлӧн] чорыд сьӧлӧм вӧсна. Та йылысь Господь водзвыв висьтавліс Мӧисей пыр.